Qyrǵyzstan parlamentiniń depýtattary sán kórmesinde ıtke qyrǵyzdyń ulttyq qalpaǵyn kıgizgen dızaınerdi jaýapqa tartýdy talap etti. Depýtattar ulttyq kıimdi janýar ne úı haıýanyna kıgizýge bolmaıdy dep sanaıdy. Bul týraly Qamshy.kz aqparat agenttigi Azattyqqa siltep jazady.
Bishkektegi sán úlgisi kezinde ıtterge arnalǵan kıim úlgisi de kórsetilgen. Uıymdastyrýshylar men dızaınerler sahnaǵa qalpaq kıgen ıt shyǵarǵan. Osydan keıin keı belsendiler ıtke qalpaq kıgizý qyrǵyz halqyn qorlaý, ultaralyq arazdyqty qozdyrý dep eseptep, qarsy shyqty. Endi bul shý parlamentke de jetti.
Belsendiler Bishkekte qarsylyq sharasyn uıymdastyryp, sán kórmesin uıymdastyrýshylar halyqtan keshirim surasyn dep talap etti. Olar prezıdentke, premer-mınıstrge, parlamentke hat jazbaq. Belsendiler ıtke qalpaq kıgizgender aıyppul tóleý kerek dep sanaıdy.
Jeltoqsannyń 28-i kúni Qyrǵyzstan parlamentiniń otyrysynda sosıal-demokrat Ryskeldi Mombekov bas prokýratýra men memlekettik qaýipsizdik komıtetinen bul isti tekserýdi talap etti. Mombekovty basqa da depýtattar qoldady.
"Qalanyń ortasyndaǵy iri saýda ortalyǵyna ıtke qalpaq kıgizý – ulttyq kıimdi syılamaý. Uıymdastyrýshylardy jaýapqa tartý kerek. Ittiń ıesi qansha keshirim surasa da ony jazalaý qajet, - dedi depýtat Tazabek Ikramov.
Depýtat dızaınerdi, ıttiń ıesine naqty qandaı jaza qoldaný kerektigin aıtpady.
Parlament jıynyna kelgen Qyrǵyzstan prezıdenti ákimshiliginiń ókili bul shýǵa qatysty naqty málimdeme jasaıtyndary málimdedi.
