2018 jylǵy 1 qańtarda Qazaqstan Respýblıkasy men Slovak Respýblıkasy dıplomatıalyq qarym-qatynastar ornaýynyń 25 jyldyǵyn atap ótti, dep habarlaıdy Qamshy.kz aqparat agenttigi QR SİM baspasóz qyzmetine silteme jasaı otyryp.
Dostyq pen áriptestiktiń shırek ǵasyry ishinde eki el arasynda senimdi saıası dıalog ornatylyp, saýda-ekonomıkalyq jáne mádenı-gýmanıtarlyq yntymaqtastyqty damytý úshin qolaıly jaǵdaılar jasaldy, shart-quqyqtyq baza keńeıtildi.
Slovak Respýblıkasynyń Prezıdenti R.Shýsterdiń 2001 jylǵy qarashada Qazaqstanǵa jasaǵan birinshi resmı sapary ekijaqty yntymaqtastyqty keńeıtýdi mańyzdy kezeńi boldy. Atalǵan sapar barysynda eki el arasyndaǵy ózara qarym-qatynas negizderi týraly Deklarasıaǵa qol qoıyldy.
Qazaqstan Respýblıkasynyń Prezıdenti N.Nazarbaevtyń 2007 jylǵy qarashada Slovakıaǵa jasaǵan resmı sapary jáne Slovak Respýblıkasynyń Prezıdenti I.Gashparovıchtyń 2010 jylǵy naýryzda Qazaqstanǵa jasaǵan resmı sapary, sondaı-aq onyń 2010 jeltoqsanda EQYU samıtine qatysý úshin Qazaqstanǵa jasaǵan jumys sapary yntymaqtastyqty nyǵaıtýǵa eleýli serpin berdi.
Parlamenttik dıplomatıa ekijaqty ózara is-qımyldy nyǵaıtýǵa mańyzdy úles qosýda. Eki eldiń joǵarǵy zań shyǵarýshy organdarynda dostyq parlamenttik toptar qurylǵan. Depýtattar arasynda turaqty túrde sapar almasýlar júzege asady. Slovakıa Parlamenti Eýropalyq Odaqtyń elderi ishinde alǵashqy elderdiń biri bolyp, QR men EO arasyndaǵy Keńeıtilgen áriptestik pen yntymaqtastyq týraly kelisimdi ratıfıkasıalady.
Saıası dıalogty odan ári kúsheıtýge mańyzdy úlesin Slovak Respýblıkasynyń Syrtqy jáne eýropalyq ister mınıstri M.Laıchaktyń 2016 jylǵy qarashada Qazaqstanǵa jasaǵan resmı sapary qosty. Sondaı-aq syrtqy saıası vedomstvolar basshylarynyń turaqty kezdesýi men SİMaralyq konsýltasıalardyń ótkizilýi ekijaqty yntymaqtastyqty ilgeriletýdiń tıimdi tetigi boldy.
Saýda-ekonomıkalyq saladaǵy qarym-qatynastar dáıekti jáne údemeli túrde damyp keledi. Energetıka, mashına jasaý, elektrotehnıka, aýyl sharýashylyǵy, farmasevtıka, kóliktik ınfraqurylymdy damytý, bilim jáne týrızm salalary ekonomıkalyq ózara is-qımyldyń perspektıvalyq baǵyttary bolyp tabylady. Eki eldiń isker toptarynyń jaqyndasýyn ilgeriletýde Ekonomıkalyq jáne ǵylymı-tehnıkalyq yntymaqtastyq jónindegi úkimetaralyq komısıasynyń róli zor, búginge onyń 6 otyrysy ótti.
Qazaqstan men Slovakıa negizgi halyqaralyq máseleler boıynsha uqsas ustanymdardy qabyldaıdy jáne BUU, EQYU men basqa halyqaralyq uıymdar aıasynda jahandy qaýipsizdik pen beıbitshilikti nyǵaıtýǵa óz úlesterin qosý úshin halyqaralyq arenada syndarly ózara is-qımyldy júzege asyrady.
QR azamattary úshin EO tarapynan vızalyq tártipti jeńildetý máselesi boıynsha Slovakıa resmı túrde Qazaqstanǵa qoldaý kórsetip otyr. Óz kezeginde, 2017 j. 1 qańtardan bastap slovak azamattaryna Qazaqstanda 30 kún boıy vızasyz bolý múmkindigi berildi.
Qazaqstan men Slovakıa eki el halyqtarynyń ıgiligi úshin aldaǵy ýaqytta ekijaqty qarym-qatynastardy jan-jaqty nyǵaıtýǵa jáne damytýǵa baǵdarlanǵan syrtqy saıası baǵytty odan ári jalǵastyrýǵa nıetti.
