Qańǵybastar úıin mekendegen Qazaqstannyń tanymal hırýrgi Jumabek Dúısembaevtiń taǵdyry almatylyq Halıda Imanjanovany beı-jaı qaldyrmady. Áıel uzaq oılanbastan Almaty qalasy áleýmettik beıimdeý ortalyǵyna baryp, qart adamdy óz úıine alyp ketken. Aqsaqal da áıeldiń usynysyna birden kelisedi. Halıda Imanjanovanyń úıine baryp, aqsaqalmen tildesken caravan.kz portalynyń suhbatyn Qamshy.kz aqparat agenttigi oqyrman nazaryna usynady.

70 jastaǵy Jumabek Dúısembaev 35 jyldan kóp ýaqytyn medısınaǵa arnady. Júzdegen adamnyń ómirin qutqardy. Otbasyly boldy. Alaıda qazirgi ýaqytta burynǵy áıeli men eresek eki balasy da otaǵasymen qarym-qatynasyn úzgen.

«2011 jyly zeınetkerlikke shyǵyp, Aqtóbedegi eki bólmeli páterimde balalarymmen birge turǵanmyn. Birde áıelim maǵan burynǵy dáriger retinde páter berilý kerektigin aıtty. Ol úshin biz ajyrasyp, páterdi áıelimniń aǵasynyń atyna jazdyrýymyz kerek eken. Qujattarǵa qol qoıylǵan soń meni úıden shyǵaryp jiberdi. Barar jerim, basar taýym bolmady. Úıimniń aýlasynda túnep júrgem. Biraq áıelim meni aldyp, Almatyǵa jiberdi. Onda ápkemniń kútip júrgenin aıtty», - dep jylap eske aldy qarıa ótkenin.

Belgisiz qalaǵa kelgen Jumabek Dúısembaevty buzaqylar soqqyǵa alyp, qaltasyndaǵy bar aqshasyn jymqyryp ketken.

«Kózimdi ashsam, dalada jatyr ekem. Birden óz-ózime kele almadym, basym aýyrdy. Ótip bara jatqan adamdardan kómek suradym, biraq adamdar kómek berýden bas tartty».

Almaty 1 vokzaly mańynda adasyp júrgen qarıany polıseı qyzmetkerleri baıqap qaldy. Qarıanyń basynan ótkergen oqıǵasyn tyńdap, tamaqtandyryp, ony beıimdeý ortalyǵyna aparady.

«Sóıtip qańǵybastar úıinen biraq shyqtym. Ortalyqtyń qyzmetkerleri áıelimmen tildesip kórýge tyrysty, alaıda áıelim menimen sóılesýge túbegeıli qarsy boldy. Uldaryma da habarlasyp kórdi, olar da sóılespedi», - dep kúrsindi aqsaqal.

Endi mine 2 aptadan beri 70 jastaǵy Jumabek ata taza, jyly úıde turyp keledi. Áıel aqsaqaldy óz ákesindeı kútip júr.

«Ómirde mundaı meıirimdi adamdar bar dep oılamaǵan edim. Óz-ózime áli kele alar emespin», - dedi qarıa.

Halıda Imanjanova tájirıbeli kosmetolog maman. Ol Jumabek atadaı bilikti mamannyń qańǵybastar úıinde jatqanyn bilgende, júregi qanjylaǵanyn aıtady.

«Hırýrg – óte kúrdeli mamandyq. Ol qanshama adamnyń ómirin qutqardy, túbi ózi dalada qaldy. Túni boıy sol qarıany oılap, kóz ile almadym. Aqyry, shydaı almaǵan soń ózim baryp, úıime alyp kettim. Ony qarttar úıine jiberý úshin birneshe qujat daıyndaý kerek, ol ýaqytqa deıin meniń janymda tursyn dep sheshtim. Ony kórgende óz ákemdi kórgendeı boldym. Dál sondaı meıirimdi, adal jan», - deıdi Halıda.

Onyń ústine Halıda Imanjanova buǵan deıin de bala-shaǵasy dalaǵa qýyp shyqqan qart áıelge kómektesken. Ol birneshe kún Halıdanyń úıinde turdy. Alaıda ájeıdiń alys týystary muny bilgen soń alyp ketýdi uıǵarǵan.