Almaty qalasynda Áýezov teatrynyń dırektory Erlan Biláldiń isine qatysty baspasóz konferensıasy ótti, dep habarlaıdy Qamshy.kz aqparat agenttigi.

Atalmysh baspasóz konferensıasynda elimizge belgili akter Asanáli Áshimov óz pikirin bildirdi.

«Qymbatty áriptester. Bul teatrdyń tarıhyna toqtalyp otyrýdyń qajeti joq. Sebebi, bul teatrdyń istep júrgen jumystary qashan da el aldynda kórinip turady. Ásirese, sońǵy eki jylda birneshe elderge gastróldik saparlarmen shyǵyp, úlken memleketterge baryp elimizdi tanytyp júr. Munyń barlyǵy, árıne, teatrdyń dırektoryna baılanysty, basshylyqqa baılanysty.

Bireneshe jerlerde suhbat bergenimde, osy teatrdyń qazirgi tańda jaqsy dárejede, basshylyǵynyń arqasynda bedeli jaqsy ekendigin maqtanyshpen aıtyp júremin. Erlannyń adal, ary taza azamat ekendigin, segiz qyrly, bir syrly ekendigin halyq biledi. Osy bizdiń kollektıvti turǵyzyp qoıyp daýysqa salsań, 99 paıyzy bul sózimniń durystyǵyna qosylar edi. Arasynan ony qaralaıtyn bireń-sarań ǵana adam tabylýy múmkin, kollektıv bolǵannan soń ondaı mindetti túrde bolady. Kez kelgen adam júz paıyz eldiń bárine jaqsy kórine bermeıdi.

Men aıtar edim, shetelderde, kóptegen órkenıetti elderde para berip, ustap bergen adamdy sottaıdy. Ol adamdy satqyn deıdi. Sondyqtan, men bul isti uıymdastyrǵan adamdy sotqa shaqyramyn», - deıdi Asanáli Áshimov.

Qazaqstan Teatr qaýymdastyǵynyń prezıdenti, halyq ártisi  Asanáli Áshimov Erlanǵa para bergen azamattardy da jazaǵa tartýdy surady.

Aıta keter bolsaq, M.Áýezov atyndaǵy akademıalyq qazaq drama teatrynyń dırektory Erlan Bilál 1,5 mln teńge para para alǵany úshin ustalǵan bolatyn.

M.Áýezov atyndaǵy akademıalyq qazaq drama teatrynyń dırektory Erlan Bilál  óziniń kinásin tolyqtaı moıyndaǵandyqtan qamaýǵa alynǵan joq. Qazirgi ýaqytta sotqa deıingi tergeý jumystary júrgizilip jatyr.