Tamara Asar nebári 20 jasynda iri jol apatyna ushyrap, bir aıaǵynan aıyrylǵan. Ánshi bul kúni týǵan aǵasynyń úılený toıyna bara jatqan eken. Ómirin túbegeıli ózgertken jol apaty jaıly Tamara Asar The Efır jobasynda aıtty.

«Aıaǵym ushyp qolyma tústi. Ony sómkeme salyp aldym. Tilegim, júregim aǵam men inim dep soqqannan keıin, «aǵam aman bolsyn, Beka, Beka» dep aıqaılaı berdim. Ony kópshilikke kórsetpeýge tyrystym. Erke qyz boldym. Qazir artqa qarap, meni tárbıelegen qandaı darhan halyq dep oılanamyn. Etegimdi qolymmen jaýyp, aıaǵymdy sómkege salyp jasyryp, ony kóliktiń artyna tyǵyp úlgerdim. Sebebi aldymyzda úlken avtobýs kele jatty, ishi tolǵan er adam. Solarǵa kórsetpeý maqsatynda ishime kirip ketken temirdi sýyryp aldym. Osynyń bári qyzýmen bolǵan qubylys. Sol kezdegi tilegim ákem men aǵama qan kórsetpeý edi. Ol meniń keremettigim emes, tárbıe. Aǵam úshin aıaqqa turdym. Sebebi rólde sol boldy. Aǵamnyń eńsesi túspesin dedim», – dep aǵynan jaryldy  ánshi Tamara Asar.

Tamara Asar óziniń mahabbaty jaıly, jol apatynan keıin alǵa demeý bergen jary týraly da baıandap berdi.

«Ol qalanyń jigiti, men aýyldyń qyzy edim. Ómirden nebári 30 jasynda ketti. Ózi óte qyzyq adam, meni ómirge qatty beıimdedi. Jol apatyna ushyraǵan kezimde Samat qıyn jaǵdaıǵa túsip, habar ala almaǵan. Ol kezde uıaly telefon degen joq. Al men ony osyndaı jaǵdaıǵa túskenimdi estip, kelmeı jatyr dep oıladym. Jarty jyldan keıin meni anasy izdep keldi. Jaǵdaıdyń bárin kórdi, qaıtadan aralasyp bastadyq. Meni ornymnan turǵyzǵan mahabbat. Ol maǵan: «Kóresiń áli, ul týasyń, qyz týasyń»,  – deıtin», – esine aldy Tamara Asar.