1997 jyldyń qytymyr qysynda, qańtardyń qaqaǵan aıazynda Kókshetaý qalasynda jylý qazany jarylyp, sý qatyp, adamdar búrseń qaǵyp qalǵan edi. Sol sumdyq bul qalanyń tarıhyna óshpes ókinishteı bolyp jazyldy. Sodan beri 20 jyl ótse de kókshetaýlyqtar  qylyshyn súıretip qys kelgende sýyq qatty bolsa taǵy da qazandyǵymyz jarylyp, jylýsyz qalmas pa ekenbiz degen ǵariptikten aryla almaı keledi.

Óıtkeni, Kókshetaý Jylý elektr ortalyǵy (JEO) joq jalǵyz oblys ortalyǵy, munda jylýdy jergilikti qazandyq beredi. Qazir sol qazandyqtyń qýaty taýsylyp, barlyq resýrstary bitip, aýystyrýdy qajet etip otyr. Munda 20 jyl boıy aýysqan birde-bir ákimniń qarymy JEO salýǵa jetpedi. Tek bir-aq jyl ákim bolǵan Qaırat Qojamjarov qana bul isti qolǵa alǵan edi. Ony tipti Prezıdent N.Nazarbaev ta qoldaǵan. Biraq odan keıin ákim bolǵandar bul isti jalǵastyra almaı, Energetıka mınıstrliginiń vedimistik múddesinen shyǵa almaı, jobany japty.

Alaıda Kókshetaýda JEO salý jobasyn iske asyrýǵa atsalysamyz dep Qytaı men Reseı túgil Germanıa, Ulybrıtanıa, Izraıl sıaqty elderden delegasıalar kelgen. Ásirese, elimizde kóptegen jobalardy, sonyń ishinde Aqtaýdaǵy bıtým zaýytyn, 1 myń shaqyrymǵa jýyq avtojoldar salýdy iske asyrǵan Qytaıdyń «CITIC CONSTRUCTION Co. Ltd»  degen kompanıasy usynyp otyrǵan jobanyń qarajaty da, tehnıkalyq qýaty da, ekologıalyq tazalyǵy da dittegen jerden shyǵyp tur. Tek sony qoldap, iske kirisý kerek. Ony iske asyratyn qarajat kózderin de tabýǵa bolady.

Tipti, QHR Tóraǵasy Sı Szınpınniń ótken jyly Astanaǵa kelgen sapary aıasynda qol qoıylǵan ekonomıkalyq yntymaqtastyq kelisimsharttary arasynda osy joba da bolǵan. Endi sol sharýany iske asyrý tek Qazaqstan Úkimettiń aldynda tur. Májilis depýtaty Aıqyn Qońyrov osy máseleniń bárin egjeı-tegjeıli aıtyp, Úkimet Basshysy Baqytjan Saǵyntaevtyń atyna depýtattyq saýal joldap, jobany iske asyrýdy usyndy. Endigi sóz Úkimet Basshysynda. Kókshetaýdy ǵariptikten qutqarý sol kisiniń qolynda.

S.Eleý, sarapshy