Aqtóbe oblysynda órtengen avtobýstaǵy Ózbekstan azamattarynyń aldyn ala tizimi jarıalandy. 18 qańtar kúni Aqtóbe oblysynyń Yrǵyz aýdanynda órtengen jolaýshylar avtobýsynda 52 ózbek azamaty qaza tapqan. Órtten bes adam – Ózbekstannyń eki azamaty men Ońtústik Qazaqstan oblysynyń úsh turǵyny aman qalǵan, dep Azattyqqa súıene otyryp jazady Qamshy.kz aqparat agenttigi. 

Ózbekstan tótenshe jaǵdaılar mınıstrliginiń habarlaýynsha, ázirge aldyn ala 29 adamnyń aty-jóni anyqtalǵan. Marqumdardyń barlyǵy 19-41 jastaǵy er adam, Namangan oblysynyń turǵyndary.

Sonymen qatar órtten aman qalǵan eki ózbek azamatynyń da Namangan oblysynyń turǵyny ekeni belgili bolǵan.

Avtobýs órti qurbandarynyń máıiti 19 qańtarǵa qaraǵan túni Aqtóbege ákelingen. Oblystyq densaýlyq saqtaý basqarmasynyń basshysy Áset Qalıevtiń aıtýynsha, múrdeler qatty kúıip ketkendikten, syrttaı qarap olardyń kim ekenin ajyratý múmkin emes.

Aqtóbe oblysy ákimi baspasóz qyzmetiniń 19 qańtarda habarlaýynsha, Qazaqstan men Ózbekstan sarapshylary kúni-túni sot-medısınalyq saraptama jumystaryn jasap jatyr.

Aman qalǵan bes adamnyń aty-jóni keshe jarıalanǵan. Olardyń arasynda Ózbekstannyń eki azamaty - 1988 jyly týǵan Ahror Iskakov pen 1980 jyly týǵan Israıldjon Myrzahmedov bar. Qalǵan úsh adam - Ońtústik Qazaqstan oblysynyń turǵyndary - Maqsat Pernebkov (1985 jyly týǵan), Barat Tańatarov (1978) jáne Nurjan Qyrǵyzbaev (1968).