Aqtóbe oblysynda avtobýstaǵy órtten mert bolǵan ózbekstandyq 52 azamattyń súıegin Ózbekstan tótenshe jaǵdaılar mınıstrliginiń arnaıy ushaǵy 19 qańtarda Astana ýaqytymen saǵat 21 shamasynda Aqtóbeden Ózbekstanǵa alyp ketken. Bul týraly Aqtóbe oblystyq ákimdiginiń baspasóz qyzmeti habarlady, dep Azattyqqa súıene otyryp jazady Qamshy.kz aqparat agenttigi.
Avtobýstaǵy órtten 52 adamnyń qazaǵa ushyraýyna baılanysty Qazaqstan qurǵan úkimettik komısıanyń múshesi, Qazaqstan ishki ister mınıstriniń orynbasary Erlan Turǵymbaev negizgi boljam boıynsha, qaıǵyly oqıǵaǵa órt qaýipsizdigi talaptaryn saqtamaý sebep bolǵan dep habarlaǵan.
"Órtten tiri qalǵandardyń aıtýynsha, qozǵaltqyshy óship qalǵan avtobýsta otyrǵandar sýyq salondy jylytý úshin eki saǵattan artyq ýaqyt dánekerleıtin sham jaǵyp otyrǵan. Kólik ishinde bes lıtr benzın quıylǵan plasmassa ydys bolǵandyǵy anyqtaldy. Negizgi boljamǵa sáıkes, shamnan bólingen gaz ben benzın qospasy salonǵa tolǵan. Álgi ydystaǵy benzın tógilgen kezde lezde ot tutanyp, bas-aıaǵy bes mınýttyń ishinde salondaǵy adamdar órtten mert bolǵan" deıdi vıse-mınıstr.
Onyń sózinshe, oqıǵa ornyn eki táýlik boıy zerttegen mamandar avtobýstan qarý-jaraq, oq-dári nemese olardyń qaldyqtary tárizdi kúmándi eshteńe tappaǵan. Sonymen birge Erlan Turǵymbaev qaıǵyly oqıǵaǵa jol-kólik oqıǵasy sebep bolýy múmkin degen boljamdy da joqqa shyǵarǵan.
Densaýlyq saqtaý vıse-mınıstri Alekseı Soı avtobýstaǵy órtten aman qalǵan bes adam – úsh qazaqstandyq jáne eki Ózbekstan azamatynyń densaýlyq jaǵdaıy jaqsy dep habarlaǵan. "Zardap shekkenderdiń densaýlyǵyna eshqandaı qaýip tónip turǵan joq. Olardy aýrýhanadan shyǵarýǵa bolady" degen ol. Aqtóbedegi jedel járdem aýrýhanasynyń bas dárigeri Rahymjan Arystan órtten zardap shegip, reanımasıaǵa jetkizilgen eki ózbek azamaty juma kúni aýrýhanadan shyqqany týraly habarlady.
Órtten aman qalǵan úsh qazaqstandyq ázirshe jedel járdem aýrýhanasynda. Tergeýshiler qaıǵyly oqıǵaǵa qatysty olardan jaýap alyp jatyr.
Qańtardyń 18-i kúni tańerteńgi saǵat 10:30 shamasynda Aqtóbe oblysynyń Yrǵyz aýdany Qalybaı aýylynan 10 kılometr qashyqtyqta Shymkent - Samara tasjolynda jolaýshylar avtobýsy órtengen. Bılik oryndarynyń habarlaýynsha, avtobýsta barlyǵy 57 adam bolǵan, olardyń 52-i qazaǵa ushyraǵan. Qurban bolǵandardyń barlyǵy – Ózbekstan azamattary. Úsh jolaýshy men eki júrgizýshi aman qalǵan.
