Sot sarapshylarynyń jumysy qıyn. Jalaqy tómen, jumys kóp jáne VICH, S gepatıtin juqtyrý qaýpi joǵary dep jazady Qamshy.kz aqparat agenttigi caravan.kz-ke silteme jasap.

Ádilet mınıstrligi men depýtattar sot saraptamasyn sapaly etý men maman ómirin jeńildetý joldaryn qarastyrdy.

Depýtattar máıithanada

Bıyl úkimet saǵatyna májilismender úlken daıyndyqpen keldi. Olardyń kóbi Qazaqstannyń birqatar oblystaryn aralaǵanda máıithanalarǵa da bas suqty.

– 2013 jyly premer-mınıstr birqatar mınıstrlikke máıithanany jaqsy qalypqa keltirýdi tapsyrǵan, - dedi QR Májilis vıse-spıkeri Vladımır Bojko.

Astanada KSRO kezinde salynǵan máıithana óte kishkentaı ekenin, ǵımarattyń qazirgi qala turǵyndarynan bes ese az adamǵa arnap salynǵanyn mysal etti.

Almaty máıithanasyndaǵy jaǵdaı da nashar ekenin aıtady. «Qarjy mınıstrligi jańa máıithana qurylysyna qarjy bólmeıdi, al jaýapty vedomstvalar bir-birine silteıdi», – deıdi Vladımır Bojko. Onyń sózinshe, Qazaqstanda vıdeofotografıa men psıhofılologıa arqyly saraptama jasaı alatyn mamandar jetispeıdi.

Az jalaqyǵa jumys isteıtin sarapshy

Zańnama jáne sot-quqyqtyq reforma komıtetiniń tóraǵasy Nurlan Ábdirov 20 jyldyq tájirıbesi bar mamandardyń ózi aıyna 120-150 myń jalaqy alatynyn aıtady.

– Mamandardyń jumysy jaýapkershilikti talap etedi jáne júıkege salmaq túsiredi. Olar VICH, týberkýlez, S gepatıtin juqtyrýy múmkin.

Sońǵy bes jylda jumys ornynda 56 maman týberkelez aýrýyn juqtyrdy. Onyń ishinde dáriger, meıirbıke bar. 26 qyzmetker gepatıtke shaldyqqan.

Sot sarapshylaryna VICH/SPID-pen aýyrǵandardyń máıitterimen jumys istegende qosymsha qarajat tólenbeıdi. Bul másele áli sheshilmegen.

Eki jyl buryn sot saraptamasy ádilet mınıstrliginiń quzyryna ótkende Qazaqstanda bul mamandyq múlde joıylyp kete jazdady. Depýtattardyń aıtýynsha, atalmysh mamandyqty tek «Astana» medısına ýnıversıtetinde oqytady jáne QazUÝ-da ǵana biliktilikti arttyrý kýrsy bar.