«EýroHım MHK» AQ quramyna kiretin Qazaqstandaǵy «EýroHım-Qarataý» JSHS kásiporny fosforıt untaǵyn óndirýge arnalǵan joba iske qosylǵaly beri fosforıt untaǵynyń alǵashqy bir mıllıon tonnasyn óndirip, tıep jóneltti, dep jazady Qamshy.kz aqparat agenttigi.
«Bizdiń jobanyń birinshi kezeńi tabysty aıaqtalyp, fosforıt untaǵyn óndirý jáne bastapqy qaıta óńdeý jónindegi jobalyq qýattylyqtarǵa shyqtyq. Hımıalyq keshendi salýǵa arnalǵan ınvestısıalyq jobanyń ekinshi kezeńi josparlanǵan tártipke sáıkes júzege asyrylyp jatyr», - deıdi «EýroHım-Qarataý» JSHS bas dırektory Dmıtrıı Vladımırovıch Valyshev. Onyń aıtýynsha, qazirgi tańda qoldanystyq jobalaý jumystary atqarylyp (jumystyń 50%-y oryndalǵan), Hımıalyq keshen salynatyn alańdy daıyndaý maqsatynda jer qazý jumystary júrgizilip jatyr, sondaı-aq, jabdyq jetkizýshilerdi tańdaý maqsatynda tenderlik is-sharalar uıymdastyrylyp, jabdyqty jetkizý jóninde shart jasasý baǵytynda jumys jasalyp jatyr. Qazirgi tańda jobanyń ekinshi kezeńin júzege asyrýǵa 130 mln. AQSH dollarǵa teń ınvestısıa quıylǵan.
Osyǵan deıin habarlanǵandaı, «EýroHım» kompanıasy «Mıneraldy tyńaıtqyshtardy shyǵaratyn zaýytty salý jáne Qazaqstan Respýblıkasyndaǵy Qarataý fosforıt alabynyń kenoryndaryn ıgerý» boıynsha ınvestısıalyq jobany júzege asyrýda. Qurylystyń birinshi kezeńi 2015 jyldyń sońynda aıaqtap bitirildi, al 2016 jyly Qazaqstandaǵy EýroHım kásiporyndary jylyna 640 myń tonna fosforıt untaǵyn óndiretin jobalyq qýattylyǵyna shyqty.
Jobanyń birinshi kezeńin júzege asyrý kezinde 126 mln. AQSH dollaryna teń ınvestısıa quıyldy. Jańatas qalasyndaǵy hımıalyq keshenge quıylǵan ınvestısıalardyń jalpy kólemi 750 mln. AQSH dollaryn qurady dep baǵalanǵan. Sondaı-aq, «EýroHım» kompanıasy óńirdiń áleýmettik-ekonomıkalyq damýyna ınvestısıa quıýdy jalǵastyryp, búgingi kúni osy maqsatqa 21 mln. AQSH dollaryn baǵyttaǵan.
«EýroHım-Qarataý» JSHS 2018 jyldyń 18 qańtarynda qaıta tirkeýden ótip, endi reseılik «EýroHım MHK» AQ kompanıasynyń Qazaqstandaǵy enshiles kásiporny bolyp tabylady.
Kompanıa týraly anyqtama
EuroChem Group AG - negizinen azottyq jáne fosforlyq tyńaıtqyshtardy, sondaı-aq, organıkalyq jolmen sıntezdelgen ónimderdi jáne temir kenin óndiretin álemdegi jetekshi agrohımıalyq kompanıa. Top qurylymy tiginen yqpaldastyrylǵan jáne onyń qyzmet sheńberine paıdaly qazbalar men kómirsýtekti óndirýden bastap, tyńaıtqyshardy óndirý, logıstıkasy jáne dıstrıbýsıasyna deıingi qyzmet túrleri kiredi.
EýroHım kompanıasy 2008 jyly «Sary-Tas» AQ memlekettik aksıalar qorjynyn satyp alǵan ýaqyttan beri Qazaqstanda qyzmetin júrgizip keledi. Sol kezeńde zaýyttyń issiz toqtap turǵanyna 15 jyl bolǵan-tyn. Kompanıa barlyq bereshekterdi, salyqtar men zeınetkerlik aýdarymdardy tólep, jumysshylar óz eńbekaqylaryna qol jetkizdi. 2009 jyly Jambyl oblysy Sarysý aýdanyndaǵy Jańatas qalasynda «EýroHım-Tyńaıtqyshtar» JSHS jumysyn bastady, al 2013 jyly «EýroHım-Qarataý» JSHS paıda boldy. Tolyǵyraq aqparatty Toptyń saıtynan taba alasyz: www.eurochemgroup.com.
