Ózbekstan Ulttyq qaýipsizdik qyzmeti Qaraqalpaqstannyń keıbir aýdandarynda turatyn qazaqtardy jer aýdara bastady, dep habarlaıdy Qamshy.kz aqparat agenttigi algakarakalpakstan.com saıtyna silteme jasap.

Derekterge sensek, mundaı jaǵdaılar Qońyrat, Qaraózek, Taqtakópir aýdandary men Qaraqalpaqıa aýylynda bolyp jatyr.

Saıttyń jazýynsha, barlyq másele ózbekterdi Ferǵana men Ándijannan joǵaryda atalǵan aýdandarǵa kóshirip ákelýden bastalǵan. Buǵan jergilikti qazaqtar narazylyq bildirip, sol úshin ózbek bıligi olardy deportasıalaýǵa kirisken.

Bılik jer aýdarylǵan qazaqtardyń jer telimderin tartyp alǵan. Ózbekstan ókimetiniń mundaı sheshimine jergilikti turǵyndar jappaı narazylyq bildirýde. Sebebi kóptegen otbasy oırandalyp, qoldaryndaǵy bar dúnıe-múlkinen aıyrylǵan. Al jer aýdarylmaǵan qazaqtar qystyń kózi qyraýda jylýsyz jáne jaryqsyz qalyp otyr.

Sáıkesinshe, ishki Ózbekstannan kóshirip ákelingen ózbekterdi ornalastyrý jumysy qarqyndy júrgizilýde. Olarǵa jer telimderi bólinip, jańa úıler salynǵan, aýylsharýashylyǵyna arnalǵan jańa tehnıkalar berilip jatyr. Sonymen qatar ózbekterdi azyq-túlikpen qamtamasyz etý úshin bankter qarastyrǵan, deıdi avtor.

Jergilikti turǵyndarǵa keshki toǵyzdan keıin syrtqa shyǵýǵa jáne ózge oblystardan kóship kelgen ózbektermen qarym-qatynasqa túsip, sóılesýge qatań tyıym salynǵan. Eki adamnan artyq jınalyp turýǵa da bolmaıdy. Atalmysh tártipti buzǵan azamattardyń barlyǵyn Qazaqstanǵa deportasıalaý kózdelgen, dep jazady saıt.