Almaty ákimdigi Ulystyń uly kúni – Naýryz meıramyna daıyndyq sharalaryn áli bastamaǵan, dep jazady Qamshy.kz aqparat agenttigi.

Kún men tún teńelip, qys boıy qar qursaýynda bolǵan tirshilik oıanatyn, jer men kók jańaratyn mezgilge nebári birer aı qaldy. Alaıda tyrp  etken qala basshylyǵy joq. Naýryzǵa daıyndyq barysyna baılanysty jibergen saýalymyzǵa ákimdik «Naýryz meıramynyń konsepsıasy ázirlený ústinde» degen jaýap qatty.

2017 jyldyń qazanynda kalendar boıynsha aýysatyn Jańa jylǵa daıyndyq barysyn ákimdikten surastyrǵanymyzda ózimizge kerekti jaýapty sol aıda-aq aldyq. Onda merekege daıyndyqtyń Táýelsizdik kúninen keıin bastalatyny, jergilikti búdjetten 600 mıllıondaı qarjy bólingeni, qalany bezendirý úshin qandaı dızaın elementteriniń qoldanylatyny búge-shúgesine deıin jazylǵan.

Al byltyr Jańa jylǵa daıyndyqtyń shyn mánisinde qashan bastalǵany qala turǵyndaryna málim. Táýelsizdik kúni bylaı tursyn, jeltoqsan bastalmaı qala túrli-tústi jyltyraqtarǵa tunyp turdy. Dúkender men iri saýda ortalyqtarynyń ishi-syrty bezendirilip, shyrshalar ornatyldy. Jańa jyldyq kóńil-kúıdi kúzdiń qara sýyǵynda-aq sezingen edik. Merekege oraı túrli jeńildikter jasalyp, baıqaýlar ótkizildi. Sonda Almaty ákimdiginiń eki sólegeni me? Muny túsine almadyq.

Bul ár jyl saıyn aıtylyp júrgen áńgimeniń bir saryny. Aıtyp sharshaǵan halyqtyń qarasy kóp. Ǵasyrlar boıy  ata-babamyz asyr salyp toılap kele jatqan óz meıramymyz Reseı patshalyǵy tusynda kelgen Jańa jyldyń tasasynda qalyp qoıǵaly biraz boldy. Oǵan dálel – búginde elimizdiń keı óńirinde Ulystyń uly kúni bir kún ǵana toılanady. Qala turǵyndary merekeni tek 22 naýryzda sezine alady. Onda da alańǵa baryp, jarty kúndik konsert tamashalaıdy. Bir kese Naýryz kójesin iship, qazaq estradasy ánshileriniń ánderin tyńdaýmen-aq ýaqyty ótedi. Al aýyldy aımaqtarda tek sol kúni erlerimiz shapan jamylyp, áıelderimiz komzolyn kıedi. Balalar asyq oınap, kúresip, altybaqan teýip sol bir kúnniń qyzyǵyna batyp qalýǵa tyrysyp baǵady. Árıne, bir kúndik sharaǵa daıyndyqty asyqtyrmaýǵa bolatynyn qala basshylyǵy da jaqsy bilip alǵan.

Naýryz meıramy jóninde Memleket basshysy Nursultan Nazarbaev: «Tarıhy tereńde jatqan Naýryz merekesi qazaq jerinde árqashan toılanǵan, alaıda, bir zamandarda halqymyz ony joǵaltyp aldy. Elimiz táýelsizdik alǵannan keıin tól merekemizdi biz qaıtadan jańǵyrttyq. Bul kúni urysqan aǵaıyn tabysatyn, renjisip qalǵan jastar qaıtadan tabysyp, mahabbattaryn arttyryp, bas qosatyn, barlyq jamanshylyq umytylatyn, jaqsylyqqa qaraı bet buratyn kez bolǵan. Túbinde bizdiń naǵyz jańa jylymyz osy Naýryz meıramy bolýy qajet. Qytaı óziniń jańa jylyn aqpannyń ortasynda bir apta toılaıdy. Shyǵystyń barlyq halqynyń óz jańa jyldary bar. Biz de túbinde óz merekemizge kelýimiz kerek» degen bolatyn. Iaǵnı Naýryz merekesiniń mańyzyn túsine bilýimiz kerek. Alaıda tól merekemiz týraly saýalymyzǵa basshylyqtan mardymdy jaýap ala almadyq.