Memleket basshysy Qazaqstandaǵy dıplomatıalyq mısıasynyń aıaqtalýyna baılanysty Reseı Federasıasynyń elshisi M.Bocharnıkovpen kezdesti, dep habarlaıdy Qamshy.kz aqparat agenttigi Aqordanyń resmı saıtyna silteme jasap

Nursultan Nazarbaev M.Bocharnıkovtyń Qazaqstan men Reseı arasyndaǵy qarym-qatynasty nyǵaıtýǵa qosqan úlesin erekshe atap ótip, onyń Qazaqstandaǵy dıplomatıalyq qyzmetine rızashylyq bildirdi.

– Siz Reseıdiń Qazaqstandaǵy elshisi retinde 11 jyl qyzmet atqardyńyz. Bul jyldar ishinde Qazaqstan men Reseı arasyndaǵy qarym-qatynas nyǵaıdy. Biz dıplomatıalyq baılanystarymyzdyń 25 jyldyǵyn atap óttik. Óńiraralyq yntymaqtastyǵymyz damyp, joǵary deńgeıdegi saparlar men kezdesýlerimiz jıileı tústi. Bizdiń seriktestigimiz – memleketaralyq qarym-qatynastyń jarqyn mysaly, – dedi Qazaqstan Prezıdenti.

Memleket basshysy eki eldiń halyqaralyq arenada tabysty yqpaldastyq ornatqanyn aıtty.

– Biz halyqaralyq deńgeıde bir-birimizdi qoldaımyz. AQSH-qa saparym kezinde Reseı men Amerıka arasyndaǵy qarym-qatynas máselesine zor mán berdim, – dedi Nursultan Nazarbaev.

Mıhaıl Bocharnıkov eki el arasyndaǵy qarym-qatynastardyń joǵary deńgeıde damyp kele jatqanyn aıtyp, Qazaqstannyń jahandyq qaýipsizdikti nyǵaıtý isindegi belsendi qyzmetine toqtaldy.

– Qazaqstanda 11 jyldan astam atqarǵan qyzmetim barysynda elderińizge degen rızashylyq sezimim arta tústi. Qazaqstannyń BUU Qaýipsizdik Keńesine múshe bolýy jáne bul organǵa tóraǵalyq etýi halyqaralyq beıbitshilik pen qaýipsizdikti qamtamasyz etý isindegi elderińizdiń mańyzdylyǵyn kórsetip otyr, – dedi Reseı Federasıasynyń Qazaqstandaǵy elshisi.

Sonymen qatar M.Bocharnıkov eki eldiń Eýrazıalyq ekonomıkalyq odaq aıasyndaǵy yntymaqtastyǵynyń nátıjeleri men aldaǵy perspektıvalaryn atap ótti.

Kezdesý sońynda Nursultan Nazarbaev M.Bocharnıkovty «Dostyq» ordenimen marapattady.