Kezdesýde Memleket basshysyna «Sıfrlyq Qazaqstan» memlekettik baǵdarlamasynyń iske asyrylý barysy jáne buǵan deıin berilgen tapsyrmalardy oryndaý úshin atqarylǵan sharalar jóninde baıandaldy dep habarlaıdy Qamshy.kz aqparat agenttigi Aqordaǵa silteme jasap.

– Sıfrlandyrýdyń arqasynda Qazaqstan ekonomıkasy 30 paıyzǵa ósýi kerek, ol aqshaǵa shaqqanda 2 trıllıon teńgeden asady, – dedi Qazaqstan Prezıdenti.

Nursultan Nazarbaev Qazaqstanda jınaqtalǵan tájirıbe men quzyrettilikti saqtaý úshin sıfrlandyrý salasyndaǵy memlekettik tapsyrystardy júzege asyrý máselelerin saralaýǵa otandyq bıznestiń qatysýy qajet ekenin atap ótti.

– Sıfrlandyrý baǵdarlamasy bekitildi. Memleket oǵan az aqsha bólip otyrǵan joq, sondyqtan olardyń tıimdi paıdalanylýyn qamtamasyz etý kerek, – dedi Memleket basshysy.

Asqar Jumaǵalıev Qazaqstan Prezıdentine «Sıfrlyq Qazaqstan» baǵdarlamasynyń oryndalýynan kútiletin nátıjeler jóninde málimdedi. 

– Sıfrlandyrýdy engizýdiń arqasynda óndirýshi ónerkásipte ónimniń ózindik quny tómendep,  óndiris kólemi ulǵaıady. Sondaı-aq, elektrondy komersıa salasynda 200 myńǵa jýyq jańa jumys orny ashylady dep otyrmyz. Bizdiń esebimiz boıynsha, tek keden jáne salyq qyzmetterin sıfrlandyrý nátıjesinde memleket qazynasyna 100 mıllıard teńgeden astam qarjy túsedi, – dedi Premer-Mınıstrdiń orynbasary.

Sońynda Nursultan Nazarbaev «Jahandaný dáýirindegi sıfrlyq kún tártibi» atty halyqaralyq forýmdy ótkizýge daıyndyq jónindegi esepti tyńdap, birqatar naqty tapsyrma berdi.