Búgin BQO-nyń Aqsaı qalasynda Berezov jáne Bestaý aýyldarynan kóship kelgen turǵyndarǵa arnap salynǵan Araltal shaǵyn aýdanynda Aqsaı qalalyq №8 jalpy orta bilim beretin mektebi ashyldy, dep jazady Qamshy.kz aqparat agenttigi.
Mektep ǵımaraty tolyqtaı zamanaýı úlgide salynyp, qajetti kerek-jaraqtarmen qamtamasyz etilgen. 300 balaǵa arnalǵan bilim oshaǵynda sport zaldary, asqana, zerthana kabınetteri men sheberhana, sondaı-aq shaǵyn ortalyq jumysyna arnalǵan arnaıy oryndar qarastyrylǵan.
Oqý ordasynyń ashylý saltanatyna Batys Qazaqstan oblysy ákiminiń orynbasary Ǵ. Ospanqulov qatysyp, barlyq ata-analar men muǵalimderdi, eń bastysy – oqýshylardy aıtýly oqıǵamen quttyqtady.
Ol óz sózinde Elbasy bıylǵy Joldaýynyń «Adamı kapıtal – jańǵyrý negizi» atty jetinshi baǵytynda elimizdegi bilim berý salasyna erekshe kóńil bólip, bul iste ozyq júıeni qalyptastyrý kerektigin aıtqanyna toqtaldy. Sondaı-aq «Rýhanı jańǵyrý» baǵdarlamasynda da memlekettiń alǵa damýy tek bilimniń saltanat qurýy arqyly ǵana múmkin dep aıtylǵanyna erekshe nazar aýdardy.
Bul oraıda oblys kóleminde atqarylǵan aýqymdy ister týraly aıtyp, jyl saıyn bilim sapasyn arttyrý, muǵalimderdiń biliktiligin arttyrý, jańa bilim berý nysandarynyń qurylysyn júrgizilip jatqanyn jetkizdi.
Sonyń ishinde ótken jyly oblys boıynsha 24 bilim berý nysany salynsa, bıyl tek qańtar aıynyń ózinde 2 birdeı jańa mektep paıdalanýǵa berilip otyrǵandyǵyn tilge tıek etti. Olardyń bireýi kúni keshe Oral qalasynyń Derkól shaǵyn aýdanynda berilgen 600 oryndyq mektep bolsa bolsa, ekinshisi - 300 balaǵa arnalǵan Araltal mektebi.
Esterińizge salsaq, qazirgi ýaqytta Bórli aýdanyna qarasty Berezov jáne Bestaý aýyldary tolyq kóshirilip, turǵyndar jańa turǵyn úımen jáne qarjylaı kómekpen qamtyldy. Balalar úshin arnaıy jańa balabaqsha men mektep salyndy.
