Almaly aýdandyq sotynda M.Áýezov atyndaǵy Qazaq memlekettik akademıalyq teatrynyń eks-dırektory Erlan Biláldiń isi boıynsha sot talqylaýy bastaldy, dep habarlaıdy Qamshy.kz aqparat agenttigi QazAqparat caıtyna silteme jasaı otyryp.
Sot barysynda Erlan Biláldiń qorǵaýshysy isti jýrnalıserdiń qatysýynsyz talqylaýǵa ótinish bildirdi.
Sýdıa taraptardy tyńdaı kele jýrnalıserge beınekamera men sýretke túsirýge tyıym saldy.
Biraq, BAQ ókilderi sot otyrysyna qatysyp, aýdıojazba júrgize alady.
Sot otyrysynda belgili akterlar Bolat Ábdilmanov, Asanáli Áshimovter boldy. İs materıaldaryna sáıkes, Erlan Bilál «Sezam» qaıyrymdylyq shyǵarmashylyq qorynyń basshysy Qaırat Baıanovtan 1,5 mln teńge kóleminde para almaq bolǵan. Bul qarjyǵa teatr ǵımaratynda balalarǵa arnalǵan qoıylym ótýi tıis bolatyn. «Kúdikti tergeý kezinde óz kinásin tolyq moıyndady. Onyń kinási is materıaldarymen dáleldendi», — dedi memlekettik aıyptaýshy. Búgin Erlan Bilál óziniń áreketine qatysty túsinikteme berdi.
«Syıaqy týraly kelistik, 2 qańtarda kezdestik. Ol maǵan 600 myń teńge, 4 qańtarda 900 myń teńge berdi. Sol kezde men ustaldym. Óz kinámdi tolyq moıyndaımyn. Bas kezinde Baıanov maǵan ózi kelip sóılesip júretin. Bizde jylda balalarǵa arnalǵan qoıylymdar, shyrshalar ótedi. Ol ózi maǵan alǵys bildirý úshin keldi. 600 myńdy qaıda jibergenim esimde joq. Qaryzdarymdy tarattym. Maǵan eshkim qysym jasaǵan joq, men kinámdi óz erkimmen moıyndap otyrmyn», — dedi Erlan Bilál. «Sezam» qaıyrymdylyq shyǵarmashylyq qorynyń basshysy Qaırat Baıanov sotta kýáger retinde jaýap beredi.
Aıta ketý kerek, M.Áýezov atyndaǵy Qazaq memlekettik akademıalyq teatrynyń eks-dırektory Erlan Bilál teatr ǵımaratynda 900 myń teńgemen ustalǵan bolatyn. Almaty qalasynyń Memlekettik qyzmet isteri jáne sybaılas jemqorlyqqa qarsy is-qımyl departamentiniń habarlaýynsha, kúdikti kinásin moınyna alǵandyqtan, kepilmen bosatylǵan bolatyn. Keıinirek sot sanksıasy negizinde kúdikti 1 mln 205 myń teńge kóleminde kepil somasyn tóledi. Erlan Bilálǵa QR QK 366-babynyń 2-bólimi, 24-babynyń 3-bólimi boıynsha aıyp taǵylyp otyr.
