25 qańtar Almaty ákimi Baýyrjan Baıbek Tatarstan Respýblıkasy Premer-mınıstriniń orynbasary Vasıl Shaıhrazıevpen kezdesti, dep jazady Qamshy.kz aqparat agenttigi qala ákimdiginiń baspasóz qyzmetine silteme jasap.

Taraptar saýda-ekonomıkalyq jáne mádenı-gýmanıtarlyq yntymaqtastyqty nyǵaıtý máselelerin talqylady.

Megapolıs ákimi eki el halyqtarynyń tyǵyz mádenı jáne tarıhı baýyrlastyǵy iskerlik baılanystardy nyǵaıtýǵa yqpal etetinin atap ótti. Qazirgi kezde Qazaqstanda sheteldegi sany jaǵynan eń kóp ekinshi tatar qoǵamdastyǵy turady. Qaladaǵy úsh etnomádenı birlestikter mádenıetti, tildi, tatar halqynyń dástúrin damytýda mańyzdy jumystardy júzege asyryp, elimizdegi jalyphalyqtyq birlikti nyǵaıtýǵa aıtarlyqtaı úles qosýda.

Óz kezeginde Vasıl Shaıhrazıev Almaty men Qazan arasyndaǵy óńiraralyq yntymaqtastyqtyń halyqtar dostyǵyn nyǵaıtýǵa jáne túrli salalar boıynsha tájirıbe almasýǵa barynsha yqpal etip otyrǵanyn aıtty.

«Búgin Jambyl atyndaǵy Qazaq Memlekettik fılormanıada ótetin tatar mýzykasynyń konserti jergilikti kórermenderdi baı tatar repertýarymen tanystyryp, mádenı baılanysty nyǵaıta túsedi», - dedi Tatarstan Premer-mınıstriniń orynbasary.

Kezdesý barysynda tatarstandyq delegasıaǵa «bir tereze» qaǵıdasy boıynsha ınvestorlarǵa qyzmet kórsetetin Ortalyqtyń, Indýstrıaldy aımaq pen «ITP» AEA-nyń jáne «Smart City» jobasynyń áleýetteri kórsetildi.

Jalpy, taraptar týrızmdi damytý, kásipkerlikke qoldaý kórsetý, bilim, mádenıet jáne basqa aspektilerde yntymaqtastyqty kúsheıtý máselelerin talqylady.