Sońǵy kúnderi jıilep ketken qaýesetter jáne áleýmettik jelilerdegi aqparatqa baılanysty QR Energetıka mınıstrligi málimdeme jasady, dep habarlaıdy Qamshy.kz aqparat agenttigi.

Mınıstrliktiń deregine súıensek, elimizde halyqty kómirmen qamtamasyz etýde jaǵdaı turaqty. Qazaqstannyń bir de bir óńirinde qatty otynnyń tapshylyǵyna qatysty dúrlikpe baıqalmaıdy.  Uzyn sonar kezekte turǵan adamdar men júk kólikteriniń qaqtyǵystary jónindegi vıdeolar jalǵan.

Sonymen qatar, QR Energetıka mınıstrligi oblys ákimdikterimen jáne «Qazaqstan Temir Joly» UK AQ-men birlesip óńirlerge kómirdi jetkizýge táýlik saıyn monıtorıń júrgizedi, ári bul másele turaqty baqylanyp otyr.

2017 jyly elimizde 106,7 mln tonna kómir óndirildi, bul 2016 jylǵy kórsetkishten 8,2 mln tonnaǵa artyq. 29,3 mln tonna kómir eksporttaldy, al qalǵan kómir ishki qajettilikke jumsaldy.

Osy oraıda Qazaqstannyń energıa óndirýshi uıymdaryna 56,3 mln tonna, ıaǵnı 2016 jylmen salystyrǵanda 7,1 mln tonnaǵa artyq kómir berildi.

Jedel derekterge sáıkes, 30 qańtarǵa deıingi merzimde óndirilgen kómir kólemi 8,6 mln tonnany qurady.

Tutynýshylarǵa komýnaldyq-turmystyq qajettilikke 763,8 myń tonna kómir jiberildi.

«Qazaqstan Temir Joly» AQ málimetine sáıkes, 2018 jyldyń 30 qańtaryna deıingi merzimde temir jol kóligimen komýnaldyq-turmystyq qajettilikke jáne halyqqa 457,2 myń tonna kómir jóneltildi. Avtokólikpen 300 myń tonna kómir túsirildi.

2018 jylǵy 30 qańtardaǵy jaǵdaı boıynsha kómirdiń qory men oblystarǵa jetkizilýi tómendegideı:

Aqmola oblysy – 85,9 myń tonna; Astana qalasy – 17,2 myń tonna; Aqtóbe oblysy – 2,1 myń tonna; Almaty oblysy – 77,4 myń tonna; Almaty qalasy – 6,8 myń tonna; Shyǵys Qazaqstan oblysy – 114,7 myń tonna; Jambyl oblysy – 8,9 myń tonna; Qaraǵandy oblysy – 53,0 myń tonna; Qostanaı oblysy – 24,3 myń tonna; Pavlodar oblysy – 9,8 myń tonna.