Dúnıe jym-jyrt, alǵandaı nala jutyp,
Múlgip jatty aq tańdy dala kútip.
Aq júzine qorasan daq túskendeı
Júre berdi Aı beti qaraýytyp
Sharshatqanda tirliktiń kúıkiligi
Adam-pende eken ǵoı uıqy quly
El uıqyda, altyn Aı soǵan ǵana
Kerekteı-aq zar ılep ıt ulydy
Muńǵa orap saı-saıdy, qyr-qyratty,
Jandy mújip, súıekti syrqyratty
Ulyǵanda úzdigip Aıǵa qarap
Tulaboıy tońazyp dir-dir qaqty
Shyryldaǵan álginde jyradaǵy
Shegirtke de tym-tyrys tyna qaldy.
Jan túrshigip selk ettim,
Shaıqap edi
Sup-sýyq bir jel soǵyp quba taldy
...Myqty edi ǵoı, taǵdyrdyń júgi jeńdi,
Ol qımaıtyn qalǵan joq túgi de endi
Jalǵyz uly apattan opat bolǵan
Jarymjan shal sákide kúńirendi
Surar jan joq kóńil men ómir jaıyn,
(Ólgiń kelse – árıne, ólim daıyn)
Sen qaıdasyń, Batıha-aý,
Qulazydym ǵoı
Tutyldy ma ol jaqta seniń de Aıyń?
Myrzan KENJEBAI
