Ortalyq komýnıkasıalar qyzmetinde Astana qalasynda jol qozǵalysy qaýipsizdigin qamtamasyz etýge arnalǵan baspasóz konferensıasy ótti, dep jazady Qamshy.kz aqparat agenttigi.
İs-sharaǵa Astana qalasy İİD Jergilikti polısıa qyzmetiniń bastyǵy polısıa polkovnıgi Baqytjan Malybaev, Astana qalasy İİD Jergilikti polısıa qyzmeti bastyǵynyń orynbasary polısıa polkovnıgi Tahır Abdýrahmanov, Astana qalasy İİD Ákimshilik polısıa basqarmasy Avtomattandyrý jáne elektrondyq qyzmet kórsetý bólimshesiniń bastyǵy polısıa podpolkovnıgi Nurjan Adılov, Astana qalasy İİD Ákimshilik polısıa basqarmasy Tirkeý-emtıhan jumysy bóliminiń bastyǵy polısıa maıory Eldar Danıarov, Astana qalasy İİD Ákimshilik polısıa basqarmasy Jol tehnıkalyq ınspeksıa bóliminiń erekshe tapsyrmalar jónindegi aǵa ınspektory polısıa podpolkovnıgi Bahytjan Altybaı qatysty.
Búgingi kúni qalanyń kóshe-jol jelileriniń jalpy aýmaǵy 1146, 6 km. quraıdy. Byltyr polısıa qalanyń kóshe-jol jelilerine 320 ret tekseris júrgizgen, tekseris barysynda 15 myń kılometr jer qamtylǵan. Tekseris nátıjesi boıynsha Astana qalasy Jolaýshylar kóligi jáne avtomobıl joldary basqarmasyna, aýdan ákimdikterine jáne basqa da múddeli organdarǵa 422 uıǵarym berilgen. Jaýapty adamdardyń jumys júrgizý kezinde jol qozǵalysy qaýipsizdigin qamtamasyz etý, sondaı-aq kóshe-jol jelilerin kútip-ustaýǵa jaýapty adamdardyń talaptardy oryndamaǵany úshin 224 laýazymdy adam jaýapqa tartyldy.
Kenesary kóshesinde «Merkýr» avtosalony, Esenberlın kóshesinde – KİİD, Qarasaı batyr kóshesinde – «Aýrıka» AJS, Abaı dańǵyly - A. Mambetovta Qazaqstan Respýblıkasynyń qoldanystaǵy normalarynyń talaptaryna jaýap bermeıtin rettelmeıtin jaıaý júrginshiler ótpesi alynyp tastaldy. Sondaı-aq ótkizý qabilettiligin kóbeıtý maqsatynda 8 ýchaskede jeke bólingen oń jaqty qozǵalys jolaqtarynyń qurylysy júrgizildi. Qala kósheleriniń 12 ýchaskesinde «Bus Line» qoǵamdyq kólikteri úshin bólingen jolaqtar qoldanylady.
Jyldan jylǵa JJE-ni buzýdy jazyp alýdyń avtomatty júıesi jelisi keńeıýde. Qazirgi ýaqytta qalada jyldamdyq rejımin jazyp alatyn «Red Speed» stasıonarlyq jyldamdyq ólsheýishi, «Vocord» apparat kesheni, «Integra KDD» jol qozǵalysyn baqylaý júıesi sıaqty 115 júıe ornatylǵan.
«Memlekettik jeke seriktestik» jobasyn iske asyrý aıasynda elordada 2017 jyldyń qazanynan bastap 20 jelilik jol ýchaskesinde «Bus Line» boıynsha buzýshylyqtardy jazyp alatyn «Sergek» aparattyq-baǵdarlamalyq kesheni paıdalanýǵa engizildi. Keshen jol qozǵalysyn táýlik boıy avtomatty baqylaý múmkindigin usynady, sondaı-aq kólik quraldarynyń JJE-ni buzýyn qashyqtan jazyp alýǵa arnalǵan. «Sergek» aparattyq-baǵdarlamalyq keshenin engizý qalada jol-kólik oqıǵalary sanynyń qysqarýyna aıtarlyqtaı yqpal etti. 2017 jyldyń qorytyndysy boıynsha tómendeý 1.7 %-dy qurady. «Sergek» ABK iske qosylǵannan bastap 2017 jyldyń aıaǵyna deıin 242 mln. teńgeden astam somaǵa 35 myńnan astam quqyq buzýshylyq óńdeldi. Aǵymdaǵy jyly 9 mıllıonnan astam teńgege 1580 quqyq buzýshylyq tirkeldi.
Jol qozǵalysyn qadaǵalaýdy júzege asyrý kezinde jol qıylysynan ótý qaǵıdasyn buzý, apattylyq jaǵdaıyn týdyrý, qozǵalystyń qarsy jolaǵyna shyǵý, jyldamdyq rejımin arttyrý, kólik quralyn mas kúıde basqarý sıaqty apattylyqqa ákep soqtyratyn JJE-ni buzýshylyqqa erekshe kóńil bólinedi. 2017 jyly 197 myńnan astam jol qozǵalysyn buzýshylyq anyqtaldy, barlyq foto-beınetirkeý júıesi 939 mln. teńgeden astam somaǵa 60 myńǵa jýyq quqyq buzýshylyqty tirkegen.
2017 jyldyń ishinde kóshedegi jol-kólik oqıǵalaryn jáne olardyń saldarynan bolatyn aýyrtpalyqty qysqartý, jol qozǵalysy qaǵıdasynyń talaptaryn elemeıtin júrgizýshilerdi anyqtaý maqsatynda Astana qalasynyń polıseıleri «Qaýipsiz jol», «Avtobýs», «Sońǵy qońyraý», «Joldaǵy balalar qaýipsizdigi», «Jol qozǵalysy qaýipsizdiginiń onkúndigi», «Mas júrgizýshi», «Quqyqtyq tártip» sıaqty jáne basqa da jedel-aldyn alý is-sharalary ótkizildi.
