QR Energetıka vıse-mınıstri Ǵanı Sádibekov Qaraǵandy oblysynda ótken jumys sapary sheńberinde «Shubarkól kómir» AQ kómir razrezinde boldy, dep jazady Qamshy.kz aqparat agenttigi.

Sádibekov kómir baseıniniń jaǵdaıymen jáne damý perspektıvalarymen tanysyp ótti. Onyń ishinde taý-ken jumystarynyń jumys barysyn, suryptaıtyn keshendi jáne kómirdi jóneltý prosedýrasyn qarap ótti.

2017 jyly kásiporyn 10,45 mln. tonna óndirip, rekord ornatty, onyń ishinde halyqtyń komýnaldyq-turmystyq qajettiligine arnalǵan kómir kólemi 3,3 mln. tonnany qurady, bul 2016 jylmen salystyrǵanda 100 myń.tonnaǵa artyq.

««Shubarkól» AQ áleýmettik kómir shyǵaratyn negizgi jetkizýshi bolyp tabylady. Eldegi halyqtyń komýnaldyq-turmystyq qajettiligine kómirdiń úshten bir bóligi dál osy jerde óndiriledi», - dedi vıse-mınıstr BAQ ókilderine bergen suhbatynda.

2018 jyly kásiporyn 12 mln. tonna kómir óndirýdi, onyń ishinde komýnaldyq-turmystyq qajettilikke 300 myń.tonna ósimmen 3,6 mln.tonna otyn óndirýdi josparlap otyr.

«Shubarkól» AQ ortasha eseppen 170-180 vagon kómir tıeledi. Kómir elimizdiń barlyq óńirlerine jóneltiledi.

«2018 jyldyń qańtar aıynda ǵana Almaty oblysyna qatty sýyqqa baılanysty 1055 vagon kómir, Ońtústik-Qazaqstan oblysyna 500 vagon kómir túsirildi», - dedi Sádibekov.

«Shubarkól» AQ kómiriniń tehnıkalyq sıpattamasy: kómir markasy – D (uzynjalyndy), kúl kólemi – 5-13%, halyqqa arnalǵan kómir ishindegi birden bir sapaly otyn bolyp tabylady. Kómirdiń ylǵaldylyǵy – 14,5%. Janý jylýy – 5100-5600 kKal/kg.