Baspanaly bolý úshin otbasynyń tabysy 200 myńnan kem bolmaǵan jaǵdaıda, onyń 20 myńyn aı saıyn úzbeı salyp otyryp, bir bólmeli baspanaǵa qajetti bastapqy jarnany 10 jyl boıy jınaý kerek. Al páterdi qolma-qol satyp alý úshin kemi 20 jyldaı ýaqyt qajet. Bul týraly KTK sarapshylardyń deregine súıenip málimdedi.
Zertteý qorytyndysyna qaraǵanda, bir ǵana jalaqymen baspanaly bolý bizde tym qıyn. Bul múmkin bolǵannyń ózinde, qonys toıyn jyldar boıy kútýge týra keledi. Mysaly, otbasynyń tabysy 200 myń bolsa, bolashaq baspana úshin aı saıyn onyń 10 paıyzyn ǵana jınaı alamyz. Al, qalǵany kúndelikti shyǵynnan artylmaıdy eken. Osylaısha, tek arada 10 jyl ótken soń 1 bólmeli páterge qajetti bastapqy jarna jınalady. Bul ınflásıa deńgeıin qospaǵandaǵy esep. Al, osyndaı tabyspen páterdi qolma-qol satyp alý úshin kemi 20 jyldaı ýaqyt qajet. Aıyna 100 myń teńgeden jınaý úshin kiris kólemi 350 myń bolýy tıis. Bul qarqynmen bastapqy jarnany 3 jylda jınaýǵa bolady. Al, baspanaǵa ıpotekasyz 7-8 jylda qol jetkize alasyz.
Páterdi 5 jyldyń ishinde qolma-qol alǵysy keletinder bolsa, aıyna 200 myńnan depozıtke salyp otyrýlary kerek. Al, 150 myń teńge kólemindegi otbasylyq tabyspen úıli bolý múmkin emes. Sarapshylar osylaı ashyǵyn aıtty.
«Eger otbasy páter jaldap turatyn bolsa,150 myń teńge kólemindegi tabyspen múldem aqsha jınaı almaıdy. Aqsha kúndelikti shyǵynnan artylmaıdy. Iaǵnı, mundaı tabyspen bastapqy jarnanyń ózin jınaý múmkin emes jaǵdaı», — deıdi krisha.kz portalynyń sholýshysy Alına Býravseva.
Jalpy tezirek baspana kiltin alý úshin, azamattardyń kóp nársege shekteý qoıǵany abzal. Mamandardyń bul keńesi, ásirese, qazaqtar úshin qıyndaý bolǵaly tur. Óıtkeni, úıli bolmaı, toı jasamaý kerek eken. Tamaqtan da shekteý bolǵany jón.
«Eger adam páterli bolýdy maqsat etken bolsa, oǵan tezirek qol jetkizgisi kelse, keı jerlerde ózine shekteý qoıýy qajet. Máselen, bir klıentimiz bastapqy jarnany qysqa merzimde jınaý úshin túrli taǵamdardan bas tartqan, otbasy qydyrýdy toqtatqan. Únemdeý arqyly 3-4 jylda qomaqty qarjy jınaýǵa bolady», — dep túsindirdi «Turǵyn úı qurylys jınaq banki» AQ fılıaly dırektorynyń orynbasary Dıas Raqymjan.
Ótken jyly osylaı ózine kóp nárseden shekteý qoıǵandar kóp bolsa kerek, turǵyn úı naryǵy qatty jandanypty. Saýda-sattyq birden 28 paıyzǵa ósken. Mamandar buǵan klıentterine túrli múmkindikter berip otyrǵan qurylys kompanıalary ǵana emes, memlekettik baǵdarlamalardyń da oń áser etkenin aıtady. Al, suranysqa jer úı emes, páterler kóbirek ıe eken.
Ásirese, jurt, shaǵyn baspanalardy kóptep satyp alǵan. Aýmaǵy úlkenderine qyzyǵýshylyq tómen. Muny qurylysshylardyń eskergeni abzal.Ári jańa úıler kóbirek satylypty. Bıyl da turǵyn úı naryǵynda asa ózgeris bolmaıdy degen boljam bar. Al sharshy metrlerdiń baǵasyna kelsek, ol da 2018 jyly qatty qubylmaıdy. Sondyqtan, baspanaly bolýdy josparlaǵandar bolsa, baǵanyń arzandaýyn kútip, ýaqytty sozýdyń qajeti joq.
