Astana ákimi tasqyn sýǵa qarsy keshendi is-sharalardyń josparyn bekitti, dep habarlaıdy Qamshy.kz aqparat agenttigi Astana qalasy ákiminiń baspasóz qyzmetine silteme jasap.
Jospar 202 tarmaqtan turady, oǵan jaýapty atqarýshy retinde qala ákimdiginiń 22 qurylymdyq bólimsheleri, 8 aýmaqtyq mınıstrlik organy men bólimsheleri, 2 komýnaldyq kásiporyn kiredi.
T.Zakaránov baıandamasynda jospardyń eń negizgilerin aıta kele, tasqyn kezinde tótenshe jaǵdaıdyń bolý yqtımaldyǵyn joıýdy, ásirese «Kóktal» turǵyn alabyndaǵy jaıaý júrginshiler júretin aspaly kópirge erekshe toqtala ketti.
«Sizdiń tapsyrmańyz boıynsha osy jyly aspaly kópirdiń jobalaý-smetalyq qujatyn daıyndadyq, ol 15 naýryzǵa deıin jóndeýden ótetin bolady», – dedi T.Zakaránov.
Onyń aıtýynsha, kóktemgi jaýyn-shashynnyń kólemine boljam jasaý úshin «Kazgıdromet» RMK birlesip Moıyldy ózeniniń baseıni men Esildiń joǵary jaǵyna zertteý júrgizetin marshrýttyq karta jasalyndy. Qańtarda monıtorıń pen taldaý jasaý úshin qardyń qory týraly málimet alynǵan bolatyn.
Osyǵan oraı, qala ákimdigi qardy shyǵarý jumystaryn uıymdastyrýǵa kirisip ketti. Qys bastalǵaly syrtqa shyǵarylǵan qardyń kólemi 1,8 mln kýb m jetti, al byltyr osy ýaqytta shyǵarylǵan qar – 3,3 mln kýbometr bolǵan.
Osyǵan qaramastan Astana ákimi Áset Isekeshev MSQB basqarmasyna, qurylys, bilim, densaýlyq saqtaý, áleýmettik qamtý jáne aýdan ákimdikterine áleýmettik mańyzy bar nysandardyń (balabaqsha, mektep, orta arnaýly oqý oryndary, JOO) aýmaǵyn, qurylys alańdaryn qardan tazartýyn qamtamasyz etýdi tapsyrdy.
Jıyn sońynda qala ákimi tıisti is-sharalardy júıeli ári keshendi túrde júzege asyrýda tasqyn sýǵa qatysty qatelikter jibermeýin tapsyrdy.
