Nursultan Nazarbaev Úkimettiń keńeıtilgen otyrysynda qarjy mınıstri Baqyt Sultanovqa eki eskertý jasap, úshinshisi sońǵy bolýy múmkin ekenin aıtty, dep habarlaıdy Qamshy.kz aqparat agenttigi.

Qarjy mınıstri Baqyt Sultanovtyń sózine qaraǵanda, vedomstvo tarapynan kedendik tekserýlerdi 37,5 paıyzǵa qysqartý josparlanǵan. Degenmen, bul jospar artyǵymen oryndalyp, salyqtyq ári kedendik tekserýler 45 paıyzǵa azaıdy.

«Jalpy bul tekserýshiler basqa baǵytqa aýystyryldy. Sebebi qazirgi kezde Qazaqstan men Ózbekstan shekarasynda aýqymdy jumystar bastaldy. Bul jerdegi keıbir beketter boıynsha táýlik boıy baqylaýǵa kóshtik. Sondyqtan adamdardyń bir bóligin osynda kóshirdik. Budan bólek, tekserýshilerdiń negizgi bóligin eksporttyq baqylaý boıynsha maqsattardy sheshýge aýystyrýdamyz. Bul mindetti ınstıtýsıonaldy túrde bekitip, jaqyn arada qaıta qurylymdaýymyz kerek. Tekserýshiler sanyn 600 adamǵa azaıtyp, olardy atalǵan baǵyttarǵa aýystyramyz», - dedi Baqyt Sultanov.

«Tekserýshiler sanyn qysqartýdy eskere otyryp, qadaǵalaý-tekserý qyzmetterine aýqymdy revızıa júrgizýdi tapsyrǵan bolatynmyn. Salyq organdaryn ońtaılandyryp, qyzmetkerler sanyn qysqartýy kerek edi. Naqtyraq aıtqanda, Qarjy mınıstrligi 600 adam týraly aıtty. Endi sizder qysqartýdyń ornyna, olardy basqa baǵyttarǵa aýystyratyndaryńdy aıtyp jatsyzdar. Bul qanshalyqty ózin aqtaıdy», - dep surady Prezıdent Qarjy mınıstri Baqyt Sultanovtan.

«Men saǵan ekinshi eskertý jasap otyrymyn. Úshinshisi sońǵy bolýy múmkin. Jumysyńdy atqar. Barlyǵyn tártipke keltirý kerek, barsha Úkimet osymen aınalysýy tıis», - dedi QR Prezıdenti Nursultan Nazarbaev.