Nursultan Nazarbaev Úkimet úıindegi otyrysta burynǵy Ulttyq ekonomıka mınıstri Qýandyq Bıshimbaevqa qatysty pikir bildirdi, dep jazady Qamshy.kz aqparat agenttigi. 

«Jemqorlyqqa qarsy kúresti jalǵastyra beremiz. Sońǵy eki jylda jalpy sany 2200 shendi-sheneýnik jaýapqa tartylǵan eken. Aralarynda mınıstrler, ákim-qaralar da barshylyq», — dedi Nazarbaev. 

Sonymen qatar eks-mınıstr Qýandyq Bıshimbaevqa artqan úmittiń aıaqqa taptalǵanyn aıtyp, ókinishin jetkizdi.

«Qýandyqqa janym ashıdy. «Bolashaqpen» oqyttyq,  úlken úmit kúttik. Arty osylaı boldy. Bulardy úlken qyzmetke daıarlaýǵa qanshama ýaqyt, qyrýar qarjy jumsadyq. Árıne, ókinesiń», — dedi prezıdent.

Aıta keteıik, Bıshimbaevtiń soty byltyr qarashada bastalǵan.  Eks-mınıstr «Báıterek Development» isi boıynsha tergelip jatyr. Bıshimbaev memleket qarjysyn qymqyrdy jáne asa iri kólemde para aldy dep aıyptalyp otyr, alaıda ol ózine taǵylǵan aıypty moıyndaǵan joq.

Sot barysynda Nazarbaevtan jáne halqynan keshirim surady. Sebebi, óziniń aıtýynsha, qol astyndaǵy qyzmetkerlerge kózsiz senip qalǵan.