Ǵabıt Músirepov atyndaǵy Qazaq memlekettik akademıalyq balalar men jasóspirimder teatrynda «Aqqýlar uıyqtaǵanda» qoıylymynyń premerasy boldy.

Dramalyq qoıylymnyń avtory –  jazýshy-dramatýrg Nurǵalı Oraz. Rejıseri – Erjan Qaýlanov.

Poema avtory Muqaǵalı Maqataevtyń týǵan kúnine tuspa-tus kelgen premeraǵa jınalǵan halyqtyń qarasy qalyń boldy. 

Muqaǵalı poemasynyń mazmuny kópshilikke tanys. Balasynyń ómiri úshin kúresken ana, aıdynynda júzgen aqqýyn qımaıtyn Jetimkól qasireti jyrlanady. Qoıylymǵa barǵan kórermen de sony kórgisi keldi. «Átteń-aı» deımiz osy tusta.  Muqaǵalıdyń poemasynyń aty berilip, aqynnyń bir-eki óleńi oqylǵany bolmasa, poema men qoıylymnyń aýyz toltyryp aıtar baılanysy da joq.

Qoıylym barysynda birese ózińdi Muqaǵalıdyń ádebı keshinde otyrǵandaı sezinesiń, birese poemaǵa túk qatysy joq qoıylymdy tamashalaýǵa kelgendeı bolasyń.

Jasandy túsik jasatý, úlkenge degen qurmettiń azaıýy, jastardyń ómirden túńilip, bar kináni aǵa býynǵa artýy – aıta-aıta aqjem bolǵan taqyryp. Avtorlar sonda da qaıtalaýdan jalyqpaıdy.

Al ártisterdiń daıyndyǵy kemshin sıaqty. Janarynda ot oınaǵan akter ol sahnada bolmady, kórermendi úıirip ákete almady. Óıtkeni qol soqqan halyqtyń shapalaǵy shashyrańqy shyǵyp jatty. Qoıylymnyń ýaqyty da tym qysqa. Logıkalyq túıini joq. Spektákldiń bitip qalǵanyn kórermen jan-jaǵyna jaltaqtaı qarap túsinýmen boldy.

Tek eń sońynda ǵana «Aqqýlar uıyqtaǵanda» poemasy men dramalyq qoıylymnyń azdy-kópti baılanysy baıqalady. Dastanda aqqý men balanyń demi qatar úzilse, qoıylymda sábı dúnıege kelip, aqqý óz kóline oralady.

Aıtý – paryz, sheshim shyǵarý árkimniń – óz erkinde. Qoıylymǵa kózi qaraqty kórermen ýaqyt óte kele óz baǵasyn bereri haq. Ol úshin teatrǵa baryńyz, qurmetti oqyrman!

Aıgerim TAÝBAI