Almaty oblysyndaǵy Qapshaǵaı qalasynyń ekonomıkasyna bıyl 30 mlrd teńge kóleminde ınvestısıa quıylady dep habarlaıdy Qamshy.kz aqparat agenttigi. 

Bul qarjyǵa on shaqty ınvestısıalyq jobany júzege asyrý kózdelip otyr. Sonyń ishindegi eń irileri sýdan, jelden jáne kún kózinen elektr qýatyn óndirýge arnalǵan jobalar. Sondaı-aq qyzmettik-tehnıkalyq maqsatta paıdalanylatyn jańa áýejaıdyń qurylysy bastalyp, aıaq kıim fabrıkasy men dári-dármek shyǵaratyn zaýyt salynady. Ótken jyly munda «Nurly jol» baǵdarlamasy boıynsha 11 mlrd teńgege 3 jańa yqshamaýdannyń ınjenerlik jelileri tartylyp, ınfraqurylymy jasaqtaldy. Qalanyń jylý qazandyǵy kúrdeli jóndeýden ótti. Aldaǵy ýaqytta Qapshaǵaıdyń jylý jáne káriz júıesi qaıta jańǵyrtylyp, túrli áleýmettik toptaǵy azamattarǵa arnalǵan jańa úıler turǵyzyla bastaıdy.