Qazaqstan Respýblıkasy Mádenıet jáne sport mınıstrliginiń 2018 jylǵy 12 aqpandaǵy buıryǵymen Qazaqstannyń eńbek sińirgen qaıratkeri, teatr rejıseri Maemırov Asqat Maksımuly M.Áýezov atyndaǵy Qazaq Memlekettik akademıalyq drama teatrynyń dırektory qyzmetine taǵaıyndaldy, dep habarlaıdy Qamshy.kz aqparat agenttigi M.Áýezoa atyndaǵy drama teatrynyń baspasóz qyzmetine silteme jasaı otyryp.
Asqat Maksımuly Maemırov – Qazaqstannyń eńbek sińirgen qaıratkeri, fılosofıa ǵylymdarynyń doktory (PhD), «Bolashaq» Prezıdenttik stıpendıasynyń ıegeri, T.Júrgenov atyndaǵy Qazaq ulttyq óner akademıasynyń túlegi. 2008 jyly Sorbona ýnıversıtetiniń magıstratýrasynda bilim alyp, Fransıadaǵy Parıj Ulttyq drama óneri konservatorıasynda taǵylymdamadan ótken. 2010 jyly Máskeýdiń ataqty joǵarǵy oqý orny GITIS-te - Reseı teatr óneri akademıasynda «Rejıssýra magıstri» ǵylymı ataǵyn aldy. 2015 jyly T.Júrgenov atyndaǵy Qazaq Ulttyq óner akademıasynyń doktorantýrasyn támamdap, «Qazaqstannyń teatr rejıssýrasy: sabaqtastyq pen jańashyldyq (1991-2015 jj.)» taqyrybynda doktorlyq dısertasıasyn qorǵap, «Fılosofıa doktory» ǵylymı dárejesine ıe boldy.
Eńbek jolyn Batys Qazaqstan oblystyq qazaq drama teatrynda rejıser bolyp bastady. Qurmanǵazy atyndaǵy Oral mýzykalyq kolejinde «Akterlik óner» bóliminiń meńgerýshisi, T. Júrgenov atyndaǵy Qazaq ulttyq óner akademıasynyń «Teatr óneri» fakúltetiniń dekany, T. Júrgenov atyndaǵy Qazaq ulttyq óner akademıasynyń «Akter sheberligi jáne rejıssýra» kafedrasynyń dosenti boldy. Shyǵarmashylyq jumystarynan bólek, ónertaný boıynsha fılosofıa doktory retinde ǵylymı izdenis jumystarynyń sheńberi - zamanaýı rejıssýradaǵy dástúr men jańashyldyq úrdisteri, qazirgi zamanǵy teatr óneriniń damý tendensıalary syndy taqyryptardy qamtıdy.
Otandyq mádenıettiń qazirgi zamanǵy úzdik art-menedjerleri qataryna kiredi. Elimizdiń mádenıet pen óner salasyndaǵy belgili uıymdar – «Qazaqstannyń rýhanı qory» AQ, «Qazaq áýenderi» AQ jetekshilik etti. 2017 jyly qazaqstandyq mádenıettiń kósh basyndaǵy eń iri mýzykalyq ujymdardyń biri – «Qazaqkonsert» memlekettik konserttik uıymyn basqardy. Elordalyq «Astana múzıkl» teatrynyń kórkemdik jetekshisi jáne Qazaqstan teatrlar asosıasıasynyń vıse-prezıdenti bolyp tabylady.
Asqat Maemırovtyń shyǵarmashylyq qyzmeti teatr ónerimen baılanysty. Ol Ǵ.Músirepov atyndaǵy Qazaqtyń memlekettik akademıalyq balalar men jasóspirimder teatrynda «Qara shekpen» (G. Hýgaev), M.Áýezov atyndaǵy teatrda «Qoshtasqym kelmeıdi» (A.Volodın), «Ulym saǵan aıtam» (B.Bedelhan) atty spektáklderdiń, Abaı atyndaǵy memlekettik akademıalyq opera jáne balet teatrynda S.Muhamedjanvtyń «Aısulý» operasy, «Astana Opera» teatrynda «Qyzjibek» operasyn sahnalaýǵa at salysty. Sonymen birge «Romeo men Djýletta» (J.Presgýrvık), «Qyz Jibek» (E.Brýsılovskıı), «Astana» (B.Ǵafý, A.Orenbýrgskıı) atty qazaqstandyq múzıklderdiń qoıýshy rejıseri retinde tanyldy.
Belgili qazaqstandyq rejıser Qazaqstannyń teatr ónerin birneshe ret halyqaralyq sahnalarda tanystyrdy. Avstrıa, Belgıa, Germanıa, Izraıl, Reseı, AQSH, Túrkıa, Fransıa, Armenıa, Grýzıa, Polsha, Chehıa jáne t.b. memleketterde ótkizilgen teatr festıválderinde, sımpozıýmdar men forýmdarǵa qatysty. 2009 jyly Qazaqstan sahna óneriniń tarıhynda tuńǵysh ret Nú-Iork qalasynda ótken M.Chehov atyndaǵy İ Halyqaralyq teatr festıvalinde «Zooparktegi oqıǵa» spektaklimen (rej.A.Maemırov) laýreat atandy (AQSH). 2017 jyly onyń «Aqtastaǵy Ahıko» atty spektakli (rej.A.Maemırov) Tokıo qalasynda (Japonıa) qoıyldy. Ótken jyldyń sońynda «Uly Dala teatry» atty eýropalyq týrne sheńberinde «Qyz Jibek» múzıklin (rej.A.Maemırov) álemniń bes astanasy – Brússel, Parıj, Vena, Berlın jáne Máskeý qalalarynyń kórermenderi erekshe yqylaspen qabyldady.
Dál qazirgi ýaqytta «Astana Opera» memlekettik opera jáne balet teatrynda M.Tólebaevtyń «Birjan-Sara» operasyn sahnalaý ústinde. Sonymen qatar elimizd tuńǵysh ret ótkizilgen jáne ári qaraı dástúrli jalǵastyǵyn taýyp jatqan dúnıejúzilik «Astana» teatr festıvaliniń, Q.Súgirbekov atyndaǵy jas rejıserlerdiń respýblıkalyq forým-festıvaliniń, «Sahnager» ulttyq teatr syılyǵy-festıvaliniń art-dırektory.
IýNESKO janyndaǵy Halyqaralyq teatr ınstıtýtynyń Qazaqstandaǵy jumysyn júrgizý mártebesine ıe - memleketimizdiń teatr ujymdarynyń basyn biriktiretin Qazaqstan Teatrlary Asosıasıasynyń vıse-prezıdenti.
