Jambyl oblysynyń Qylmystyq ister jónindegi mamandandyrylǵan aýdanaralyq sotynda Murathan Toqmádıdiń isine qatysty aldyn ala tyńdaý ótti, - dep habarlaıdy Tengrinews.kz.
Toqmádıdiń advokaty ózin jáne aıyptalýshyny foto men vıdeoǵa túsirmeý týraly shaǵymyn aıtty. Sot bul ótinishti qoldady.
Sot quramy jarıalandy. Eshkimnen qarsylyq túspegen.
"05.02.2018 Jambyl oblysynyń Qylmystyq ister jónindegi mamandandyrylǵan aýdanaralyq sotyna M.Sh. Toqmádıge qatysty 96-baptyń 2 tarmaǵy "j, z" boıynsha qylmystyq is kelip tústi. İs materıaly boıynsha, Almaty qalasynda qylmystyq álemniń "bedeldisi" jáne "Depýtattyq korpýs" UQT basshysy M.Sh.Toqmádı "Bank Turan Alem"AQ basqarmasynyń burynǵy tóraǵasy E.N.Tátishevti óltirdi dep aıyptalyp otyr. Bul qylmystyq is "Tórelik" aqparattyq júıesimen sýdıaǵa qarastyrýǵa úlestirilgen. Qylmystyq isti qaraýdyń merzimi men kúni belgilenbedi", - dep habarlaıdy Jambyl oblysynyń Qylmystyq ister jónindegi mamandandyrylǵan aýdanaralyq sotynyń baspasóz qyzmetindegiler.
Osyǵan deıin bıznesmenge qatysty qozǵalǵan qylmystyq istiń sotqa joldanǵany habarlanǵan bolatyn.
Murathan Toqmádıge qatysty qylmystyq is Jambyl oblysynyń qylmystyq ister jónindegi mamandandyrylǵan aýdanaralyq sotynda sýdıa Azamat Tilepovtiń tóraǵalyǵymen ótetini habarlanǵan edi.
Eske sala keteıik, Murathan Toqmádı byltyr 12 maýsymda ustalǵan bolatyn. Almatyda arnaıy qyzmet "Depýtattyq korpýs" atty qylmystyq topty ustaý boıynsha operasıa ótkizgen edi. BAQ-ta shyqqan aqparat boıynsha, bul qylmystyq topty "QazSHynyQurylys" zaýytynyń ıesi Murathan Toqmádı basqarǵan. Sondaı-aq, prokýratýra málimetinshe, onyń úıin tintý kezinde qarý-jaraq pen oq-dári tabylǵan. Al taıaýda bıznesmenge qatysty úkim shyqqan. Murathan Toqmádı 3 jylǵa bas bostandyǵynan aıyrylǵan bolatyn.
