2017 jyly Qazaqstanda 13 tastandy bala tirkelgen, dep jazady Qamshy.kz aqparat agenttigi «QazAqparatqa» súıenip. 

«Jergilikti atqarýshy organdardyń aqparaty boıynsha, 2017 jyly 13 bala qurylystan, qudyqtar men qoqys jáshikterinen tabylǵan. Olardyń úsheýi qaıtys bolǵan.

Mundaı jaǵdaı artyp jatyr: 2016 jyly 7 bala tabylǵan edi», - dep habarlady QR Bilim jáne ǵylym mınıstrliginiń quzyrly organy agenttiktiń jazbasha saýalyna.

Sondaı-aq, QR BǴM-nen alynǵan aqparatqa sáıkes bıyl eki aıdyń ishinde eki bala tabylsa, onyń biri kóz jumǵan. «Jergilikti atqarýshy organdar tabylǵan balalardy qazaqstandyq otbasylarǵa ornalastyrdy.

Jergilikti atqarýshy organdar tastandy balalardy anyqtaǵan jaǵdaıda, olardy otbasylarǵa ornalastyrý boıynsha quqyǵy basym týystaryna beriledi», - dedi QR BǴM baspasóz qyzmeti.