Almaty qalasy Óńirlik komýnıkasıalar qyzmetinde Eńbek, áleýmettik qorǵaý jáne kóshi-qon Komıtetiniń Almaty qalasy boıynsha departamentiniń basshysy Aıdynjan Narmatovtyń qatysýymen brıfıń ótti, dep jazady Qamshy.kz aqparat agenttigi.

Onyń sózine súıensek, qazirgi ýaqytta Qazaqstanda bazalyq, mindetti jáne erikti deńgeılerden turatyn kópdeńgeıli zeınetaqy júıesi jumys isteıdi.

Birinshi deńgeı (bazalyq) – memlekettik bazalyq zeınetaqy tólemi, bul zeınetkerlikke shyǵatyn barlyq azamatqa eńbek ótili men tabysyna qaramastan birdeı taǵaıyndalady.

Memlekettik bazalyq zeınetaqy tólemi Qazaqstan Respýblıkasy Prezıdentiniń 2005 jylǵy 18 aqpandaǵy Qazaqstan halqyna arnaǵan joldaýyn iske asyrý úshin 2005 jyldan bastap engizildi, ol kedeıshiliktiń aldyn alýda negizgi qural boldy jáne qarttardyń tabysyn ulǵaıtýǵa múmkindik berdi,-deıdi ol.

Ekinshi deńgeı (mindetti) – yntymaqty zeınetaqy, ol 1998 jylǵy 1 qańtarǵa deıin jınaqtalǵan eńbek ótiline jáne 10 %-dyq mindetti zeınetaqy jarnalarynan qalyptasqan zeınetaqy jınaqtarynyń esebinen júrgiziletin biryńǵaı jınaqtaýshy zeınetaqy qoryndaǵy  aýdarymdar – zeınetaldyndaǵy tabysqa baılanysty respýblıkalyq búdjet qarajatynan tólenedi.

Qazaqstan Respýblıkasy Prezıdentiniń 2014 jylǵy 18 maýsymdaǵy № 841 Jarlyǵymen bekitilgen Qazaqstan Respýblıkasynyń zeınetaqy júıesin odan ári jańǵyrtýdyń 2030 jylǵa deıingi tujyrymdamasynda yntymaqty zeınetaqy mólsherin tıimdi deńgeıde ustap turý úshin olardyń mólsherin jyl saıyn ınflásıa deńgeıinen eki paıyzǵa ilgerilete otyryp ındeksteý kózdelgen,-dep atap ótti.

Úshinshi deńgeı (erikti) – erikti zeınetaqy jarnalary esebinen beriletin tólemder.

Qoldanystaǵy Qazaqstan Respýblıkasynyń zeınetaqy zańnamasyna sáıkes, bolashaqta zeınetkerlerdiń qosymsha tabys kózine aınalatyn erikti zeınetaqy jarnalary esebinen azamattarǵa ózderiniń jınaqtaryn ulǵaıtý múmkindigi berilip otyr.

Osylaısha, qazirgi zeınetaqymen qamsyzdandyrý modeli árbir azamattyń erteńgi kúni zeınetaqymen qamsyzdandyrylýyna ózderiniń derbes jaýapty bolýyn kózdeıdi,-dep aıtyp ótti.