Reseıdiń Norılsk qalasynyń damý agenttiginiń basshysy ári qalalyq keńestiń depýtaty Sergeı Panchenko qulaǵan An-148 ushaǵynda bolǵan, dep habarlaıdy Qamshy.kz aqparat agenttigi Otyrar.kz saıtyna silteme jasap. 

Ol OQO-nyń Belye Vody aýylynda týyp-ósken. 

1996 jyly marqum Omsk memlekettik tehnıkalyq ýnıversıtetiniń baspahana fakúltetin "ınjener-tehnolog" mamandyǵy boıynsha bitirgen. Sosyn Máskeýdegi Ulttyq zertteý ýnıversıtetiniń "Joǵary ekonomıka mektebin" "jalpy jáne strategıalyq menedjment" mamandyǵy boıynsha aıaqtaǵan. 

Alǵashqy jumysyn Norılsk qalasynda bastaǵan. Baspahanada mehanık, keıin ınjener-mehanık bolyp qyzmet istegen  jáne baspahana, redaksıalyq-baspa kesheninde bas ınjener bolǵan. 2017 jyly komersıalyq emes avtonomdy «Norılsk damý agenttigin» basqarǵan. 

Sergeı Panchenkonyń artynda áıeli men eki balasy qaldy. 

Eske salsaq, Máskeýdiń Domodedovo áýejaıynan kókke kóterilgen An-148 jolaýshylar ushaǵy kóp uzamaı radardan joǵalyp ketti. Keıin ushaq qaldyqtary Máskeý oblysynyń Ramensk aýdanynda tabylǵany anyqtaldy.  «Saratov áýe jelileri» kompanıasyna tıesili ushaqtyń bortynda 65 jolaýshy men 6 ekıpaj múshesi bolǵan. Olardyń barlyǵy qaza tapty.