Ońtústik Qazaqstan oblysyndaǵy erli-zaıypty Shyńǵys hannyń zıratyn tapqanyn aıtty dep habarlaıdy Qamshy.kz aqparat agenttigi TVK arnasynyń deregin negizge ala otyryp. Ózin «kóripkel», - dep esepteıtin Gúljanar Altynbekova mońǵol bıleýshisiniń jerlengen jerin biletinine senimdi. Erli-zaıyptylar ǵalymdardyń kelýin kútpeı óz betimen qazba jumystaryn júrgizgen. Kóripkel áıel máıitti tabý úshin endi 30 santımetr jer qazý kerektigin aıtty.

OQO-nyń kóptegen turǵyndary Gúljanardy «baqsy», - dep atap ketken. Sebebi 2014 jyly oǵan Manas atty babasy Arys aýdanyndaǵy kishkentaı Lesqoz degen eldi-mekende kezinde búkil álemdi bılegen adam jerlengenin aıtqan.

«Qazir babamyz mármár tasta jatyr. Janynda eki jaǵylǵan sham men zıratyn kúzetip otyrǵan jylan, qamshy men tasbıh bar», deıdi Gúljanar Altynbekova.

Erli-zaıyptylar qazba jumystarymen 2 jyldan beri aınalysyp kele jatyr. 2 jyl ishinde talaı tylsym dúnıelerge tap bolǵanyn aıtady.

«Biz bul aımaqtan batpaqqa jazylǵan eki jazba taptyq. Eki jazbada da "ata-babamyz Shyńǵys han" dep jazylyp turdy», - deıdi Sman Ótegen.

Shyńǵys hannyń jerlengen ornyn taptyq degen erli-zaıyptylar karta retinde retinde tasty qoldanǵan. Olardyń aıtýynsha, bul tas olarǵa baǵyt baǵdar berip otyrǵan.

«Zırattyń kire berisindegi qazaq tilindegi jazý Shyńǵys hannyń mońǵol emes, qazaq ekenin dáleldeı túsedi», - deıdi jergilikti turǵyn Mahmetkárim Shanasov.

Al tarıhshylar men ǵalymdar erli-zaıyptylardyń tujyrymyna senýge asyǵar emes. Olar belgisiz aımaqty jón-josyqsyz qazý qaıǵyly jaǵdaıǵa ákelip soqtyrýy múmkin ekenin eskertýde.

Eske salsaq, buǵan deıin de Shyńǵys hannyń zıratyn tapqanyna senimdi bolǵan Gúljanar 13 metr tereńdikke baratyn shuńqyr qazdyrtyp, eshqandaı zırat tappaǵan bolatyn.

Bul sensasıalyq jańalyq ońtústikterdi asa tańǵaldyrmaýy múmkin. Sebebi osydan biraz jyl buryn shymkenttik jazýshy Shyńǵys hannyń zıraty Shardara aýdanynda degen bolatyn.