Qyrǵyzstannyń Batken oblysy Qadamjaı aýdanynyń turǵyndary qytaılardy elderine qaıtarýdy talap etip, narazylyq aksıasyna shyqty dep habarlaıdy Qamshy.kz aqparat agenttigi. Turǵyndardyń aıtýy boıynsha qytaılar altyn kenin óndirýge kelgen. Narazylyq aksıasynyń vıdeosy áleýmettik jelide qyzý talqylanyp jatyr.
Vıdeodaǵy kóriniske qaraǵanda, narazylyq aksıasyna qatysýshylardyń kóbisi qarttar. Olar qytaıdyń qyrǵyzǵa keler qaýpin aıtyp, saqtanýǵa shaqyrdy.
«Biz jerimizdi bermeımiz. Ketsin! Úkimet bizge járdemaqy da tólemeıdi. Biz óz kúnimizdi ózimiz kórip otyrmyz. Mal baǵyp, eginmen aınalysamyz. Qytaılar ketsin jerimizden. Olardyń bizge paıdasynan zıany kóp», – deıdi jınalǵandar.
Sonymen birge jınalǵan jurtty basý úshin oppozısıoner Adahan Madýmarov kelip, sóz sóıledi.
«Biz shýmen eshteńe sheshe almaımyz. Osyndaı keń jerimizdiń taǵdyryn japadan jalǵyz sheshe almaımyz. Osy jaǵdaıdy estigen boıda, 10-15 mınýttyń ishinde sizderge keldim. Biz buǵan deıin de altynsyz ómir súrip kelgenbiz. Budan keıin de altynsyz súre beremiz», – dedi «Kelispeımin» atty opozısıalyq qozǵalystyń jetekshisi Adahan Madýmarov.
Ázirge el úkimeti bul jaǵdaıǵa baılanysty eshqandaı pikir bildirgen joq.
