Belgili jazýshy-dramatýrg Rahymjan Otarbaev dúnıeden ótti, dep habarlaıdy Qamshy.kz aqparat agenttigi.

«Óte jaqyn adamdardan estip otyrmyn bul habardy. Qaıran Aǵam-aı! Sene almaı otyrmyn! Ótken túnde júrekten dúnıe saldy.Tóbemnen jaı túskendeı bolyp otyrmyn! Imany salamat bolsyn, qaıteıin...», - dedi aqyn Baýyrjan Qaraǵyzuly. 

Rahymjan Otarbaev 1956 jyly 19 qazanda Atyraý oblysy Qurmanǵazy aýdanynda dúnıege kelgen. 1977 jyly Oral pedagogıka ınstıtýtyn támamdaǵan. Ár jyldarda «Oral óńiri» gazetinde tilshi, qazaq tili men ádebıeti pániniń muǵalimi, Qazaq teleradıo komıtetinde redaktor, «Qazaq ádebıeti» gazetinde, «Jalyn» álmanahynda bólim meńgerýshisi, Qyrǵyzstanda Qazaqstan elshiliginiń attashesi, Mańǵystaý oblystyq radıotelevıdenıe kompanıasynyń tóraǵasy, Atyraý oblystyq drama teatrynyń dırektory, QR Prezıdenti Ákimshiliginde sektor meńgerýshisi qyzmetterinde bolǵan. 2009 jyldyń mamyrynda Astanadaǵy Ulttyq akademıalyq kitaphananyń Bas dırektory boldy. Jazýshynyń ár jyldary «Sher», «Juldyzdar qulaǵan jer», «Jaıyq jyry», «Qarasha qazdar qaıtqanda», «Daýysyńdy estidim», «Otverjennyı mır» atty prozalyq jınaqtary jáne tańdamaly shyǵarmalarynyń 2 tomdyǵy jaryq kórgen. Qytaıdyń «Ulttar» baspasynan qytaı, qazaq tilinde 2 tomdyǵy, Reseıdiń «Hýdojestvennaıa lıteratýra» baspasynan orys tilinde bir tomdyǵy jáne qyrǵyz tilinde kitaptary jaryq kórgen. Jekelegen shyǵarmalary túrik, arab, aǵylshyn tilderinde basylǵan. «Beıbarys sultan», «Bas», «Nashaqor jaıly novela», «Nurjaýǵan-ǵumyr», «Syrym batyr», «Mustafa Shoqaı» syndy pesalary respýblıkalyq jáne shetel teatrlarynda sahnalanǵan. Mahambet syılyǵynyń laýreaty. Qazaqstannyń eńbek sińirgen qaıratkeri. Halyqaralyq Aıtmatov akademıasynyń akademıgi.