4 aqpanda Saryaǵash aýdanynda eki azamattyń arasynda týyndaǵan turmystyq daýdyń saldarynan bir adam kóz jumǵan edi. Ońtústik Qazaqstan oblystyq ishki ister departamenti taratqan derek boıynsha Qazaqstannyń quqyq qorǵaý qyzmetkerleriniń jedel-izdestirý sharalarynyń nátıjesinde Bostandyq aýylynyń turǵyny Navmıdın Narmetov ustalǵan. Búginde atalǵan qylmystyq ispen İİM arnaıy tergeý toby aınalysýda.
Osy oqıǵaǵa baılanysty narazylyq bildirgen aýyl jastarynyń arasynda túsindirý jumystary júrgizilip, tártipke shaqyryldy.
Budan bólek oblys ákimdiginiń mamandary men prokýratýra qyzmetkerleri birlesip, aýyldardaǵy turǵyndarǵa túsindirý jumystaryn júrgizdi. Quramynda jergilikti atqarýshy organ qyzmetkerleri, aýyl aqsaqaldary men zıaly qaýym ókilderinen quralǵan toptar aýdandaǵy barlyq mektepter men qoǵamdyq oryndarda kezdesýler ótkizýde. Tártipsizdik oryn alǵan aýyl men sol mańdaǵy eldi mekenderdiń saýda núktelerinde ishimdik satýǵa tıym salyndy.
Qaıǵyly oqıǵaǵa baılanysty jergilikti tájik dıasporasynyń aqsaqaldary men jastary marqumnyń úıine baryp keshirim surap, bolashaqta turaqtylyqty qamtamasyz etý úshin birlesken sheshimge keldi. Sonymen birge kórshiles aýyl jastaryn sabyrlyqqa shaqyryp, zań buzýshylyqqa jol bermeý kerektigin aıtyp otyr.
OQO ákimdiginiń baspasóz qyzmeti habarlaýynsha qazirgi ýaqytta aýylda tynyshtyq ornaǵan.
