Halyq qajetine jaratý úshin bankterden nesıe alady. Biraq nesıeni ósimimen qaıtarady. Bizdegi qalyptasqan jyldyq ósim 18 paıyzdan kem emes. Demek, bir mıllıon alsańyz 180 myń teńge ústememen qaıtarasyz. Damyǵan, ekonomıkalyq qýaty artqan elderde bul ósim áldeqaıda tómen, eń kóbiniki 10 paıyzdan aspaıdy. Al bizdiń ońaı tabysqa dándep alǵan komersıalyq bankterimiz eń az degende 16 paıyzdan tómen túsip kórgen emes. Jaraıdy, halyq onymen de kelisken.

«Dánikkennen qunyqqan jaman» degen sóz bar, sol aıtpaqshy aspandatqan ósimge qunyǵyp alǵan bankter ańqaý halyqtan taǵy bir ósim alatyn kórinedi. «Uıalmaǵan buıyrmaǵandy alady» demekshi uıatty múlde jıyp qoıǵan olar ózderiniń klıentterinen «ssýdalyq esepshotty» júrgizgeni úshin de aqy alady eken. Ony Májilis depýtaty Aıqyn Qońyrov álemge áıgilep, palatanyń jalpy otyrysynda jarıa etti. Depýtattyń aıtýyna qaraǵanda klıentteriniń zańdy jaqsy bilmeıtindigin paıdalanatyn betsiz bankter nesıe berý týraly Kelisimshartqa osyndaı talapty da engizip jiberetin kórinedi. Aqsha qolyna tıgenine máz bolatyn klıent uzaq-sonar Kelisimsharttyń barlyq baptaryn oqıdy deısiz be, qolyn qoıa salady. Sony paıdalanǵan aramzalar onyń moınyna qyzmetkerine ózi tóleýge tıisti shyǵyndy da arta salypty. Tek keıbir, kózi ashyq klıentter ǵana mundaı artyq shyǵyndy sot arqyly qaıtadan óndirip alatyn kórinedi, al negizgi halyq ony mańdaı teri sorǵalap tólep jatyr. Depýtat Kelisimshartqa mundaı artyq tólemdi engizbeý týraly Ulttyq banktyń arnaýly eskertýi bar ekenin de aıtty. Alaıda ony oryndap jatqan bankter shamaly, bári de aýadan aqsha jasaýǵa ábden qunyǵyp alǵan. Aıqyn Qońyrov osyny aıta otyryp, Ulttyq banktyń osy máseleni tekserýin talap etti.