Bul týraly Ońtústik Qazaqstan oblysynyń ákimi J.Túımebaev 2017 jyly atqarylǵan jumystar jaıyn baıandaǵan esepti kezdesýde málim etti.
Onyń aıtýynsha, Shymkent qalasyndaǵy aýmaǵy 427 gektardy quraıtyn «Shymkent city» shaǵyn aýdanynda «Shymkent arena» sport kesheni salynady. Osy jyly qurylysy bastalatyn bul sporttyq nysanda kúres pen atletter zaly, saýda men tamaqtaný jáne ákimshilik blogtary, qonaq úı, baseın qarastyrylǵan. Jobalyq quny 17,2 mlrd. teńge bolatyn keshen zamanaýı qurylǵylarmen jabdyqtalmaq.
Sonymen qatar ákim atalǵan shaǵyn aýdanda jalpy alańy 18 450 sharshy metr bolatyn «KONGRES HOL» jobasy boı túzeıtinin de aıtyp ótti. Quny 20,5 mlrd. teńge bolatyn nysan qurylysy 2018-2021 jyldar aralyǵynda júrgizilmek.
Shymkent qalasyn jan-jaqty damytý jaıy Elbasynyń tikeleı baqylaýynda ekenin aıtqan oblys ákimi negizgi jumystar qalanyń arhıtektýralyq kelbetin jaqsartý, ınfraqurylymyn damytý men abattandyrý, kógaldandyrýǵa baǵyttalatynyn jetkizdi.
«Qalanyń birneshe kóshelerinen ashylatyn Arbat – shahardyń eń kórikti mekenine aınalady. Budan bólek, Qoshqar ata ózeni jaǵalaýy jobasyn júzege asyrsaq, Shymkent tarıhı qalashyǵyn jańǵyrtý jobasyn da qolǵa aldyq. Sonymen qatar, Shymkent áýejaıyna jyldyq jolaýshy aǵymy 2 mıllıondy quraıtyn jańa zamanaýı termınal salý josparymyzda bar»,-dedi J.Túımebaev.
Esepti kezdesý barysynda ákim ótken aptada Úkimet tarapynan Shymkent qalasymen qosa Báıdibek, Qazyǵurt, Ordabasy, Saıram, Saryaǵash, Tólebı, Túlkibas aýdandary men Arys qalasynyń strategıalyq qajettilikterin qamtıtyn «Shymkent aglomerasıasynyń aýmaqtaryn damytýdyń óńiraralyq sqemasy» bekitilgenin aıtty. Bul oblys ortalyǵy men onyń aınalasynda ornalasqan aýdan, qala aýmaqtarynyń qarqyndy damýyna serpin beretini anyq.
