Ońtústik Qazaqstan oblysynda «Rýhanı jańǵyrý» baǵdarlamasy aıasynda Ordabasy taýynda úsh bıge monýment ornatylyp, «Qazyǵurt taýy» jobasy júzege asyrylady. Bul eki taýda týrısik ınfraqurylymdar qarastyrylyp, kıeli, qasıetti oryndardy aıaqasty etpeý jaqtary muqıat eskerilgen. Al Otyrar qalashyǵy men Arystanbab kesenesin baılanystyratyn ejelgi jol qaıta jańǵyrtylyp, onyń boıyna ulttyq qolónershilerdiń sheberhanalary boı túzeıtin bolady. Shymkent qalasyndaǵy «Túrkistan» saraıynda ótken esepti kezdesýinde oblys ákimi J.Túımebaev osylaı dedi.

Sondaı-aq, ol Qoja Ahmet Iasaýı murasynyń XVI-ǵasyrda kóshirilgen hıkmetteriniń 100-den astam qoljazba nusqasyn jarıalaý arqyly túrki dúnıesiniń rýhanı tutastyǵyn qamtamasyz etý kózdelip otyrǵanyn atap ótti.

«Bıyl oblysta rýhanı jańǵyrý tyń jobalarmen tolyqtyrylyp, osy jyly «Qymyzmuryndyq», «Qaýyn fest», «Agro fest», «Aqsý-Jabaǵylynyń alqyzyl qyzǵaldaǵy», «Týǵan jerge taǵzym» atty oblysta dástúrli túrde ótetin erekshe jobalar bastaý almaq. Olardyń qatary Shardara aýdanynyń týrısik áleýetin kóterý maqsatyndaǵy týrısik forým «Safari Shardara» is-sharalary men Saryaǵashta gólften «Open Saryagash» jarysymen tolyǵatyn bolady»,-dedi oblys ákimi.

Budan bólek, oblysta «Týǵan jer» arnaıy jobasy negizinde 50 joba daıyndalyp, 153 is-shara júzege asyrylýda. Al «Tárbıe jáne bilim» kishi baǵdarlamasy aıasynda 19 joba,  «Rýhanı qazyna» aıasynda 20 joba, «Atameken» aıasynda  10 joba, «Aqparat tolqyny» aıasynda 2 joba iske asady.

Aıta keteıik, atalǵan baǵdarlama sheńberinde «Qasıetti Qazaqstan» ortalyǵymen jalpy respýblıka boıynsha 100 nysan (qasıetti, kıeli jerler) iriktelip alynsa, onyń ishinde Ońtústik Qazaqstan oblysynan 25 nysan engizilgen.  Al IýNESKO - nyń  «Uly Jibek joly eskertkishteri» nomınasıasy boıynsha 8 eskertkish bizdiń óńirimizde. Olar – Saýran, Túrkistan, Sıdaq, Qaraspan, Jýantóbe, Kúltóbe, Otyrar, Bórjar eskertkishteri. «Kóne Túrkistan» tujyrymdamasy 3 kezeńge qarastyrylǵan.