Kóksý aýdanynyń kásipkeri aýdandyq İsker áıelder keńesiniń tóraıymy Saıda Saıtova 2012 jyldan beri N.Aldabergenov atyndaǵy mektepte turmysy tómen 35 balany bir rettik aspen tegin qamtamasyz etip keledi. Bul isin isker áıel qoǵam aldyndaǵy paryzy retinde sanaıdy, dep jazady Qamshy.kz aqparat agenttigi.
«Men alty jyldan beri bilim berý uıymdarynda tamaqtandyrýdy uıymdastyrý jumysymen aınalysyp kelemin. Osy ýaqyttan beri jyl saıyn bizdiń kompanıa az qamtylǵan, jetim qalǵan 30-35 balany óz qamqorlyǵyna alyp, tegin tamaqtandyrady. Jalpy, bul bastama basqa da mektepterde júzege asyrylyp jatyr. Bul ıgi isti kásipkerler qyzý qoldap jatqany óte qýantarlyq», - deıdi Saıda Saıtova.
Ol bıznespen 2000 jyldan bastap aınalysyp keledi. Zańgerlik bilimine qaramastan, kásipti sulýlyq salonyn ashýdan bastaǵan. Keıin saýda isine aýysyp azyq-túlik dúkenderin ashty. Al biraz ýaqyttan beri Saıda Mahmutqyzy jalpy bilim beretin mektepterde tamaqtandyrý uıymdastyrýdy qolǵa alǵan. Búginde kásipkerdiń qolastynda 10 adam jumys isteıdi. Osynshama merzim ishinde isker áıel áleýmettik jaýapkershiligi týraly umyt qaldyrǵan emes.
Óıtkeni, qaıyrymdylyq pen jaýapkershilikke, janshyrlyqqa ony balalyq shaǵynan bastap úıretken.
«Biz úlken otbasynda óstik. Úıde beseý bolatynbyz jáne sonymen birge alty nemere aǵa-qaryndastarymyzber birge tárbıelendik. Ákemiz ben anamyz bir-birimizge qoldaý kórsetip, kómekke muqtaj adamdarǵa járdemdesý mindet ekenin aıtyp otyratyn. Bul jaı ǵana sózder emes edi. Olar bizge únemi jaqsylyq pen jomarttylyqtyń naǵyz úlgisin kórsetetin. Eseıe kele óz januıamdy qurǵan soń, ata-anamnyń aıtqan ósıetterin oryndaýǵa tyrysyp kelemin», - dedi bıznesqanym.
Qazirgi tańda Saıda Saıtovanyń otbasynda úsh balasy bar. Úlken qyzy Sevara quqyqqorǵaý organdarynda qyzmet etse, 18 jasar Sultan - velosport boıynsha birinshilikter jeńimpazy, al kishi qyzy Núrıa - 7 synyp oqýshysy.
«Bala uıasynda ne kórse, ushqanda sony iledi» degen teginnen tegin aıtylmaǵan. Biz jubaıymmen birge balalarymyzǵa mahabbat, meıirimdilik pen syılastyqty tanytýǵa tárbıelep kelemiz. Olar naǵyz ultjandy, otanyna adal qyzmet etip, damýyna óz úlesterin qosatyn azamattar bolyp óssin dep tileımiz», - deıdi ol.
Kóksý aýdany Kásipkerler palatasy janyndaǵy İsker áıelder keńesiniń basshylyǵynda júrip Saıda hanym kásipker áıelder birge birqatar qaıyrymdylyq jobalaryn iske asyryp keledi.
Jaqynda isker áıelder qaýymy shuǵyl túrde ortopedıalyq aıaq kıim qajet bolǵan balaǵa járdemdesti. Kómek suraǵan áıeldiń aıtýynsha bul medısınalyq aıaq kıimdi memlekettik baǵdarlama boıynsha tegin alýǵa bolatyna qaramastan, bul úrdis uzaq ýaqyt pen kóptegen qujattardy talap etetin kórinedi. Sondyqtan da kásipkerlerdiń tez arada kórsetken qarjylaı qoldaýynyń arqasynda naýqas bala qaıtadan júre bastady.
Sonymen birge, İsker áıelder keńesi Jumyspen qamtý bólimimen seriktese aýdandaǵy ońaltý ortalyǵyna járdemdesip keledi.
«Balalarǵa erekshe yqylys pen nıet tanytý qajet. Biz bıznesiń, qoǵamnyń ókili retinde olardy qamqorlyqqa alýymyz asa mańyzdy. Ásirese, kishkentaı balalar Jańa jyldy asyǵa kútedi. Jańa jyl qarsańynda olarmen kezdesip, syılyqtar syılap turamyz. Balanyń kúlkisi men qýanyshy biz úshin baǵa jetpes baılyq», - deıdi Saıda Saıtova.
Osy jyldyń basynda isker áıel Ulttyq kásipkerler palatasy bastamashy bolǵan «Atamekenim» respýblıkalyq aksıasy barysynda Balpyq bı aýylyndaǵy N.Aldabergenov atyndaǵy mekteptiń oqýshylary úshin «ystyq shaı» uıymdastyryp, oqýshylar alǵysyna bólendi.
«Ózderińiz biletindeı, qańtar aıynyń sońynda kún kúrt sýytyp ketti. Bul ýaqytta mektepterde sabaqtar alynyp tastalynǵan bolatyn. Alaıda, mektepke UBT-ǵa daıyndalyp júrgen joǵary synyp oqýshylary keletin. Sol ýaqytta olar úshin ystyq as-shaı uıymdastyryp berdik. Balalar qýanyp qaldy», - deıdi kásipker.
Bul Saıda Saıtovanyń jasap júrgen izgi isteriniń bir parasy ǵana. Ol basqa da kásipkerler syndy óziniń qaıyrymdylyq jumystary jóninde aıtqandy unatpaıdy. Alaıda, ol jaqsylyq jasaýdy qoǵamda ádetke aınaldyrý kerektigin aıtady.
Sonymen qatar, kásipker Saıda Saıtova Kóksý aýdanyndaǵy uıǵyr halqynyń etnomádenı ortalyǵyn, ata-analar komıtetin basqaryp keledi jáne aýdandyq Kásipkerler keńesiniń múshesi bolyp tabylady.
