Semeıdiń eski kópiri atanyp ketken nysan 1961 jyly salynǵan. Sodan beri qarjy tapshylyǵynan kúrdeli jóndeý jumystary júrgizilmegen.

«Kópir  2013 jyly resmı túrde «apatty jaǵdaıdaǵy nysan» dep tanylǵan. Birneshe jyl egjeı-tegjeı tekserýge qarjy bolmaǵandyqtan, syrt kózben ǵana baqylap shyǵýǵa týra kelgen.  Endi bıyl jóndeý jumystary júrgiziledi dep josparlanýda», - dedi Semeı qalalyq Jolaýshylar tasymaly jáne avtokólik joldary bólimi jetekshisiniń orynbasary Nurlan Serǵazınov.

Onyń aıtýynsha, aldymen nysan tyńǵylyqty tekseriledi. Naýryzda almatylyq mamandandyrylǵan fırma nysandy tehnıkalyq saraptamadan ótkizý jumystaryn qolǵa alady. Sonyń nátıjesinde, kópir qalypqa keltiriledi nemese kúrdeli jóndeý jumystary bastalady. 

Apatty dep tanylǵan kópirde kólik qozǵalysy bir sátke toqtaǵan emes. Óıtkeni, Ertis ózeniniń ústinen ótetin kópir qalanyń eki jaǵalaýyn baılanystyryp tur. «Eger buryn kópirge túsetin salmaq 25-35 tonna bolsa, qazir 10 tonnaǵa deıin shekteldi. Júk kólikteriniń júrýin azaıttyq, tıisti jol belgilerin ornattyq, jol tańbalaryn salý ádisi arqyly júktemeni qysqarttyq jáne avtokólikter qozǵalysyn eki baǵytta da bir qatarǵa keltirdik», - deıdi Nurlan Serǵazınov.

Tekserý barysynda eski qujattar da eskeriledi. Tehnıkalyq saraptama úshin, búdjetten 9 mln teńge bólingen. Egjeı-tegjeı esepti mamandar qyrkúıekte daıyndap berýleri qajet.