Elbasy N.Á.Nazarbaevtiń tapsyrmasymen qazaqstandyq otbasylardy qoljetimdi turǵyn úımen qamtamasyz etýge arnalǵan «Nurly jer» biryńǵaı turǵyn úı qurylysy baǵdarlamasy jasalǵany barshaǵa aıan. Atalmysh baǵdarlama aıasynda QR Densaýlyq saqtaý mınıstrligi men «Qazaqstandyq ıpotekalyq kompanıa» AQ-y arasyndaǵy memorandýmnyń júzege asýymen medısına salasynyń qyzmetkerleri de baspanaly bolýda, dep jazady Qamshy.kz aqparat agenttigi «Pedıatrıa jáne balalar hırýrgıasy ǵylymı ortalyǵy» baspasóz qyzmetine silteme jasaı otyryp.
Búgin Pedıatrıa jáne balalar hırýrgıasy ǵylymı ortalyǵynyń basshysy Rıza Boranbaeva «Nurly jer» baǵdarlamasy boıynsha Almaty qalasy «Alǵabas» aýdanynan baspanaly bolǵan 8 qyzmetkerdi qýanyshtarymen quttyqtap, syı-syıapat jasady.
Kópten kútken qýanyshtarymen ortalyq ujymy men basshylyǵy, barsha áriptesteri men dostary quttyqtap, izgi nıet tilekterin bildirdi.
«Jańa páterge qol jetkizgen ortalyq qyzmetkerlerin qýanyshtarymen quttyqtaımyn! Medısınalyq mekemeler ishinde bizdiń ortalyqtyń qyzmetkerleri eń kóp páter kiltine ıe boldy. Áli de bir qyzmetkerimizdiń ótinishi qaralýda. «Nurly jer» baǵdarlamasy dárigerlerdiń baspana máselesin sheship qane qoımaı, elimizdiń kadr áleýetin arttyrýǵa óz septigin tıgizeri sózsiz. Bala densaýlyǵyn nyǵaıtýǵa qosar úlesterińiz kóp bolsyn! Qonystaryńyz qutty bolsyn! Úılerińizdiń shańyraǵy bıik, keregesi keń bolyp, jańa úıdiń ishinde tek tatýlyq pen bereke, qýanysh pen baqyt, qut pen yrys saltanat qursyn!» - dep aq tilegin bildirdi R.Boranbaeva.
Páter kiltine arnaıy irikteý boıynsha kóp jyldarden beri medısına salasyna bar ómirin arnap, ólsheýsiz úles qosyp kele jatqan bilikti dárigerlermen qatar, jas dárigerler de ıe boldy. Jyldar boıy jańa qonysty kútken dárigerlerdiń qýanyshynda shek joq.
