Búgingi Úkimet otyrysy taza qazaq tilinde ótti, dep jazady Qamshy.kz aqparat agenttigi. 

Memleket basshysynyń keshegi sózinen Úkimet músheleri qorytyndy shyǵarǵan sıaqty. Buǵan deıin tek oryssha shúldirlep, keıde eki tildi aralastyryp oıran-botqa jasaıtyn sheneýnikter búgin jappaı qazaqylanyp shyǵa keldi. Premer-mınıstr Baqytjan Saǵyntaev bastap bergen úrdisti mınıstrler ilip áketip, bastan-aıaq memlekettik tilde baıandama jasady. Birinshi bolyp sóz alǵan Investısıalar jáne damý mınıstri Jeńis Qasymbek taza qazaqsha sóıledi. Energetıka mınıstri Qanat Bozymbaev ta prezıdenttiń pármenin jerge tastamaıtynyn kórsetti.

Oblys ákimderi de Elbasynyń amanatyna adaldyq tanytyp, óz baıandamalaryn qazaq tilinde oqyp berdi. Aýyl sharýashylyǵy vıse-mınıstri Arman Evnıev, «Báıterek» holdıńiniń, «Qazaqınvest» kompanıasynyń basshylary da qazaqsha sóıledi.

Qarap otyrsaq, qazaqshaǵa eshqaısysy qara jaıaý emes. Ejiktese de, qınalsa da, barlyǵy derlik tyrysyp baqty. «Toqpaǵy myqty bolsa, kıiz qazyq jerge kiredi» degen osy eken ǵoı. Elbasynyń bir aýyz tapsyrmasynan shyqqan nátıje bul.

Nege ekenin qaıdam, Aqmola oblysynyń ákimi Málik Myrzalın baıandamasyn qazaq tilinde bastap kelip, sońynda orysshaǵa oıysyp ketti. Bilim jáne ǵylym mınıstri Erlan Saǵadıev te sóıtti. Sóz lámine mán berseń, bári durys, bári oryndy. Premer-mınıstrden aýyl mektepterin kompútermen, Internetpen qamtamasyz etýdi surap otyr. Biraq oryssha qospasa sóziniń dámi kirmeı me, áıteýir baıandamasynyń bir bóligin «ultaralyq tilde» oqydy.

«Ultaralyq til» degennen shyǵady. Osy kúnge deıin orys tiline qajetti qatynas quraly dep qarap keldik. Kópshilik jurtqa túsinikti bolǵan soń, amal joq, úndemedik. Shen-shekpendilerdiń yǵyna jyǵylyp, qanshama otyrysty oryssha ótkizse de, basqa shaýyp, tóske órlemedik. Qazir jaǵdaı basqasha. Birli-jarym dúbaralar bolmasa, eshkim qazaqshadan maqurym emes. Tipti, ózge ult ókilderiniń de «tóbesi tesik». Sondyqtan Úkimet otyrysynyń qazaqsha ótkenine súıinshi suraýdyń ózi retsiz. Bul – zańdylyq. Bul – mindet. Bul – qalypty qubylys. Bılik pen halyq osyǵan úırene berýi kerek.