Ulttyq ulannyń 28237 áskerı bólimi Almaty oblysyndaǵy sý basqan aýyldarǵa kómek kórsetti, dep jazady Qamshy.kz aqparat agenttigi.

Apat aıtyp kelmeıdi. Bıylǵy qystyń sońǵy kúnderi aıaq astynan aýa-raıynyń kúrt ózgerip, kún raıynyń lezde jylynýyna baılanysty Almaty oblysyndaǵy shatqaldar men jotalarda jatqan qar erip, sonyń kesirinen Almaty oblysyndaǵy Qaınazar, Yntymaq aýyldary men Uzynaǵash aýylynyń batys jáne shyǵys jaǵyndaǵy kósheleri men turǵyn úılerdi sý shaıyp, jergilikti halyqty biraz ábigerge saldy.

2018 jylǵy 26 aqpan kúni Almaty oblysy Jambyl aýdanynyń ákiminen Jambyl aýdanyndaǵy Uzynaǵash, Yntymaq jáne Qaınazar aýyldaryndaǵy tótenshe jaǵdaılardyń saldaryn joıýǵa qosymsha kúshterdi tartý úshin Ulttyq ulannyń 28237 áskerı bóliminiń mekenjaıyna ótinish hat kelip túsken bolatyn. Sonyń negizinde áskerı bólim komandıriniń sheshimimen 26-28 aqpan aralyǵynda 130-dan asa ulandyq qutqarýshylar men 10-nan asa arnaıy tehnıkalar apat oryn alǵan aýdandarda tańnan keshke deıingi merzimde qutqarý jumystaryn júrgizdi.

Ulttyq ulannyń qutqarýshy bólinisteri jeke quramynyń kúshterimen júrgizilgen jumystar nátıjesinde Uzynaǵash, Qaınazar jáne Yntymaq aýyldaryna tehnıkalarmen 400 tonna qum ákelinip 6000-nan asa qap qummen toltyryldy jáne 14 kósheniń boıynda ornalasqan turǵyn úılerdiń aýlalary jınalyp qalǵan sýlar men laılardan tazartylyp, úılerdiń ishterine sý ótpes úshin qum toltyrylǵan qaptarmen aýlalar tolyq bógetteldi. Sý basyp qalǵan 8 úıdiń turǵyndary qaýipsiz jerge shyǵaryldy. Sý baǵytyn arnalarǵa burý maqsatynda arnaıy tehnıkalarmen 300 metrden asa jyralar jasaldy. Jeke quramnyń kúshterimen 4000 metrden asa turǵyn úılerdiń aýlalary men  kósheleri jalpy kólemi 16 tonna laılardan tazartyldy. Sonyń nátıjesinde jalpy 80-ge jýyq turǵyn úıdiń sý basý qaýpi seıildi.

2018 jylǵy 28 aqpan kúni sý alǵan óńirdiń ahýalymen jáne jasalyp jatqan jumystardyń nátıjesimen tanysý úshin Almaty oblysynyń ákimi Amandyq Batalov arnaıy kelip Uzynaǵash pen Qaınazar aýyldaryn aralady jáne óz kezeginde Ulttyq ulan jaýyngerleriniń júrgizip jatqan jumystaryna úlken baǵa berip áskerı bólim komandırine alǵysyn jetkizdi.