Búgin Úkimet otyrysynda QR Premer-Mınıstri Baqytjan Saǵyntaev Elbasy jarıalaǵan bes áleýmettik bastama boıynsha memlekettik organdarǵa tıisti tapsyrmalar berdi, dep habarlaıdy Qamshy.kz aqparat agenttigi.

«Memleket basshysynyń óz bastamalaryn arnaıy Úndeý arqyly jarıalap, onda qazaqstandyqtarǵa shynaıy alǵysyn bildirýi onyń mańyzdylyǵyn arttyra túsedi. Bul – Elbasynyń halqyna usynǵan prezıdenttik ári perzenttik syıy. Ol bastamalardyń árqaısysy búgingi tańda halyqtyń kókeıinde júrgen eń mańyzdy máselelerdi qamtıdy», — dedi B. Saǵyntaev.

Prezıdent halyqty qoljetimdi baspanamen qamtý, salyq júktemesin azaıtý, joǵary bilim alýdyń qoljetimdiligi men sapasyn arttyrý, shaǵyn nesıe berýdi kóbeıtý jáne eldi gazben qamtamasyz etýdi usyndy. Atap aıtqanda, árbir otbasyna baspana alýdyń jańa múmkindikterin berý maqsatynda Ulttyq bank arnaıy uıym qurý arqyly jańa ıpotekalyq «7-20-25 baǵdarlamasyn» daıyndaıtyn bolady. Onyń negizgi sharty nesıe ósiminiń mólsherlemesi jylyna 7 prosentten, bastapqy jarnasy 20 prosentten aspaıtyn bolady. Nesıe merzimi – 25 jylǵa deıin.

Al jalaqysy tómen jumysshylardyń salyq júktemesin azaıtý  úshin Ulttyq ekonomıka mınıstrligine 2019 jyldyń 1 qańtarynan bastap, aı saıyn eń tómengi eseptik kórsetkishtiń 25 eselengen kóleminen az jalaqy alatyn jumyskerlerge salynatyn jeke tabys salyǵynyń mólsherin 1 prosent etý tapsyryldy. Bul rette, salyqty azaıtýdan shyǵatyn qarjynyń olardyń jalaqysyn kóbeıtýge baǵyttalýy tıis.

Joǵary bilim alýdyń qoljetimdiligi men sapasyn arttyryp, stýdent jastardyń jataqhanadaǵy jaǵdaıyn jaqsartý máselesi de Elbasy nazarynda Osy oraıda, Bilim jáne ǵylymı mınıstrligine jańa ekonomıkada suranysqa ıe mamandardyń qajettiligin taldaý negizinde 2018-2021 oqý jyldaryna arnalǵan joǵary jáne joǵary bilimnen keıingi kadrlardy daıarlaýǵa memlekettik bilim berý tapsyrysyn bekitý týraly Qaýly jobasyn daıyndaý júkteldi.  Sonymen qatar joǵary bilim salasyna qosymsha 20 myń grant bólip, 2020 jyldyń sońyna deıin eń kemi 75 myń oryndyq stýdentterge jataqhana salý kózdelip otyr.

Sondaı-aq Elbasy shaǵyn jáne orta bıznes úshin nesıe kólemin 20 mıllıard teńgege arttyrý bastamasyn kóterdi.

«Osy rette eńbek jáne halyqty áleýmettik qorǵaý, ulttyq ekonomıka, aýyl sharýashylyǵy, qarjy mınıstrlikterine jáne «Atameken» Ulttyq kásipkerler palatasyna: birinshi, aǵymdaǵy jylǵa respýblıkalyq búdjetti naqtylaý kezinde qosymsha 20 mıllıard teńge bólýdi eskerýdi; ekinshi, ásirese, aýyldyq jerlerde shaǵyn nesıe berý úshin qarajatty odan ári bólý boıynsha usynystar engizý tapsyramyn», — dedi B. Saǵyntaev.

Prezıdenttiń besinshi, «Eldi gazben qamtamasyz etýdi jalǵastyrý» bastamasy boıynsha Baqytjan Saǵyntaev energetıka, qarjy, ulttyq ekonomıka, ınvestısıalar jáne damý mınıstrlikterine, tıisti óńir ákimdikterine «Samuryq Qazyna» qorymen jáne «Báıterek» holdıńimen birlesip bir apta ishinde jumys tobyn qurý mindetin qoıdy.

«Qyzylorda –Jezqazǵan – Qaraǵandy – Temirtaý – Astana» baǵyty boıynsha «Saryarqa» gaz qubyryn qarjylandyrý máselesin, onyń ishinde halyqaralyq qarjy ınstıtýttarynan qajetti qarjyny tartý arqyly pysyqtaýdy tapsyramyn», — dedi ol.

Halyqtyń áleýmettik ómirine túbegeıli ózgerister alyp keletin barlyq qadamdar boıynsha biryńǵaı Jol kartasy ázirlenetin bolady.

«Qashan da halqynyń jan-dúnıesine tereń boılap,  eliniń júregindegi armanyn tamyryn tapqandaı dóp basatyn Elbasynyń bastamalaryn múltiksiz júzege asyryp, tıanaqty oryndaý – bárimizge syn! Sondyqtan, biz barlyq kúsh-jigerimizdi jumyldyryp, Elbasy júktegen, el kútken údeden shyǵa bilýge tıispiz», — dedi naqtylady QR Premer-Mınıstri Baqytjan Saǵyntaev.