Búgin QR Premer-Mınıstri Baqytjan Saǵyntaevtyń tóraǵalyǵymen ótken Úkimet otyrysynda 2013–2017 jyldarǵa arnalǵan Qazaqstanda dinı ekstremızm men terorızmge qarsy is-qımyl jónindegi memlekettik baǵdarlamanyń oryndalý barysy qaraldy. Bul týraly Qamshy.kz aqparat agenttigi habarlaıdy. Sonymen birge úkimet otyrysynda 2018–2022 jyldarǵa arnalǵan Memlekettik baǵdarlama jobasy maquldandy.
QR Ulttyq qaýipsizdik komıteti tóraǵasynyń orynbasary general-maıor Nurǵalı Bilisbekov 2018–2022 jyldarǵa arnalǵan baǵdarlamanyń maqsaty — dinı ekstremızm kórinisterin eskertý jáne terorızm qaýpin boldyrmaý arqyly adamnyń, qoǵamnyń jáne memlekettiń qaýipsizdigin qamtamasyz etý ekenin atap ótti.
2013 jyldan bastap elimizde dinı ekstremızm men terorızm ıdeologıasyn taratýdyń sebepteri men jaǵdaılaryn joıý jáne ataýly aqparattyq túsindirý jumystaryn uıymdastyrý jóninde 202 komısıa jumys isteıdi.
Málimdelgen aqparatqa sáıkes, atalǵan baǵytta jalpy sany 8,1 mln-nan astam adam qamtylǵan 96,6 myńnan astam shara ótkizildi.
Atqarylǵan jumys nátıjesinde 755 «jıhadshy» qalypty jolǵa kóshirildi. Daıyndyq jumystarynyń bastapqy kezeńinde 38 terorıstik sıpattaǵy zorlyq-zombylyq ekstremıstik naýqandarynyń iske asyrylýyna jol berilmedi. Shetelde kúdikti dinı bilim berý mekemelerinen 384 stýdent elge qaıtaryldy.
Sondaı-aq, Memleket basshysynyń tapsyrmasyna sáıkes daıyndalǵan Qazaqstan Respýblıkasynda 2018–2022 jyldarǵa arnalǵan dinı ekstremızm men terorızmge qarsy is-qımyl jónindegi memlekettik baǵdarlamanyń jobasy tanystyryldy.
Jobany ázirleý kezinde 2013–2017 jyldarǵa arnalǵan Memlekettik baǵdarlamany iske asyrý nátıjeleriniń taldaý derekteri, ekstremızm men terorızm qaýpin týdyratyn jaǵdaılar men faktorlardyń taldaýy, halyqaralyq ozyq tájirıbe, memlekettik organdardyń, ÚEU-dyń jáne qoǵamdyq birlestikterdiń usynystary eskerildi.
Ulttyq ekonomıka mınıstri Tımýr Súleımenov te atalǵan máselege qatysty sóz sóıledi. Memlekettik josparlaý júıesi qujattarynyń talaptaryna sáıkes QR dinı ekstremızm men terorızmge qarsy is-qımyl jónindegi 2013–2017 jyldarǵa arnalǵan memlekettik baǵdarlamanyń iske asyrylýynyń tıimdiligine baǵalaý júrgizildi.
Baǵalaý 4 krıterıı boıynsha júrgizildi: nysanaly ındıkatorlar men nátıjeler kórsetkishterine qol jetkizý dárejesi, is-sharalardy oryndaý tolyqtyǵy, búdjet qarajatyn ıgerý deńgeıi, nysanaly ındıkatorlardy jáne nátıjeler kórsetkishterin josparlaý.
«2 nysanaly ındıkator men 19 nátıjeli kórsetkishke kol jetkizildi. Memlekettik baǵdarlama aıasynda 115 is-shara oryndaldy», — dedi Tımýr Súleımenov.
Ulttyq ekonomıka mınıstrliginiń málimetine sáıkes, búdjet qarajatyn ıgerý deńgeıi 95,8%-dy qurady.
«Nysanaly ındıkatorlardy jáne nátıjeler kórsetkishterin josparlaý sapasy boıynsha Memlekettik baǵdarlama qabyldanǵan sátten bastap ındıkatorlar men kórsetkishterdiń mánderi, is-sharalardy oryndaý merzimderi túzetilmegenin atap ótemin», — dedi Tımýr Súleımenov.
