Astana ákimdigi turǵyndardy saq bolýǵa shaqyrdy dep jazady Qamshy.kz aqparat agenttigi Astana ákimdiginiń resmı saıtynyń deregine súıenip. Qardyń qalyń jaýǵanyna baılanysty Astana komýnaldyq qyzmeti kúsheıtilgen rejımdegi jumys kúshine aýysty.
Dál qazir qala kóshelerin 800 biregeı tehnıka men 2 myńǵa jýyq jumysshy qardan tazalap jatyr.
Saryarqa aýdanyn qardan arshýǵa 569 jumysshy men 264 tehnıka shyqty.
Esil aýdanynyń aýmaǵyna tazalaýǵa 276 tehnıka men 738 jol jumysshysy jumyldyryldy.
Almaty aýdanyn tazalaýǵa 296 tehnıka men joldy kúreýge 588 adam kiristi.
Ásirese eń birinshi avtobýs aıaldamalary men jerasty ótkel joldary, kópir, ótpejol, halyq kóp jınalatyn oryndar, aýrýhana men basqa da mańyzdy áleýmettik nysandardyń mańaıy qardan tazartyldy.
Sondaı-aq, tepkishekterge qatqan muzdan jaraqat alýshylar sanyn azaıtý úshin kóktaıǵaqqa qarsy aýla mańyndaǵy jerlerge de kóbirek kóńil bólinýde.
Ol úshin astanada kóktaıǵaqqa qarsy arnaıy quraldyń qory saqtalǵan. Al shyǵarylǵan qardy arnaıy qar tógetin polıgonǵa jetkizedi.
Qala bıligi Astana turǵyndary men qonaqtarǵa qaýipsizdik sharalaryn saqtaýda muqıat bolýǵa shaqyrady. Kólikti basqarýda jyldamdyqty azaıtyp, araqashyqtyqty saqtaýmen qatar, shalt qımyl jasamaý kerektigin eskertedi.
Budan basqa, jaıaý jol júrginshileri belgisine de abaı bolý kerek. Arǵy betke ótý úshin tek jaıaý jol júrginshilerinen ótýi tıis. Qala joldaryndaǵy arnaıy jumys istep jatqan tehnıkalar kólikterdiń ary-beri júrý baǵytyn kishkene báseńdetýi múmkin. Osyǵan baılanysty aldyn ala erterek qalada júretin baǵdaryńyzdy josparlap alýyńyz qajet.
