Ońtústik Qazaqstan oblysy Saryaǵash aýdanynda zorlyqqa ushyrady delingen jeti jastaǵy oqýshy bala jaqyndarymen birge Astanaǵa jetkizildi. Bul týraly Qamshy.kz aqparat agenttigi 24.kz-ke silteme berip habarlaıdy. Elimizdiń bala quqyqtary jónindegi ýákili Zaǵıpa Bálıeva Shymkentke arnaıy baryp, keleńsiz oqıǵaǵa dýshar bolǵan jetkinshekti ózimen birge elordaǵa alyp kelgenin málimdedi.

Esterińizge sala keteıik, Ońtústik Qazaqstandaǵy jaǵdaıdan keıin óńirdegi jaýapty sheneýnikterdiń birazy qyzmetinen bosatylyp, keıbiri qatań sógispen qutyldy.

Oblys ákimi Janseıit Túımebaev óz orynbasary Ulasbek Sádibekovke qatań eskertý berip, aımaqtyń bilim salasyna jaýapty Isataı Saǵyndyqov pen Saryaǵash aýdanynyń ákimi Qaırat Ábdýálıevke de sógis berdi. Al Saryaǵash aýdandyq jergilikti polısıa qyzmetiniń basshysy Berdaly Orazǵalıev pen Abaı aýyldyq jergilikti polısıa bólimshesiniń basshysy Áset Ibragımov jáne Iývenaldy polısıa bólimshesiniń №73 jáne 74-mektepterge jaýapty polısıa ınspektory Qaldybaı Sarıev qyzmetterinen bosatyldy.

Qazaqstannyń Bala quqyqtary jónindegi ýákili, Parlament Májilisiniń depýtaty Zaǵıpa Bálıeva atalǵan iske qatysty tilshilerge qysqa ǵana jaýap berip, taǵdyry tálkekke ushyraǵan balanyń elordada tıisti mamandardyń nazarynda ekenin aıtty. QR Bala quqyqtary jónindegi ýákili Parlament Májilisiniń depýtaty Zaǵıpa Balıeva: Biz bul máselege qatysty birneshe mamandy shaqyramyz. Bilim mınıstrligi men ishki ister mınıstrliginiń de ókilderi keledi. Olar barlyq suraqtarǵa tolyq jaýap berýi tıis. Búgin men bir saǵat ǵana uıyqtadym. Sondyqtan demalyp alyp, erteń arnaıy baspasóz máslıhatyn uıymdastyramyz,-dedi.