Aqtóbede azamattyq nekedegi kúıeýinen taıaq jep sharshaǵan kelinshek balalaryn tastap, úıinen qashyp ketti. 38 jastaǵy Gúlsim Jıenbaeva otaǵasy balta alyp umtylǵanda, kishkentaılaryma qaraılamaq túgili, oılanýǵa ýaqytym bolmady deıdi.  Bul týraly «Eýrazıa» birinshi arnasy habarlaıdy.

«Qulaǵym isip ketti, urǵanda myna jerde sotrásenıe alǵanmyn» - deıdi jábirlenýshi.

Gúlsimniń azamattyq nekedegi kúıeýimen kóńil jarastyrǵanyna bes jyl bolǵan. Sodan beri kórgenim tek qorlyq dep otyr. Qıt etse judyryǵyn ala júgiretin kúıeýi eshteńeden qaımyqpaıtyn kórinedi. Óıtkeni Gúlsim – jetim, izdeýshisi joq, áke shesheden erte aıyrylǵan. Birinshi kúıeýinen týǵan ulyn shettetkeni bylaı tursyn, óziniń eki balasyn da túrtpekteıtindi shyǵarypty. 

— Qolymen urady, pyshaqpen urady, baltamen qýyp shyǵady. Bes jyl boıy qorlyq kórip kele jatyrmyn,- deıdi qorlyq kórgen Gúlsim Jıenbaeva.

Áıeli men balalaryna kún kórsetpeıtin 61 jastaǵy azamatqa polıseıler tek aıyppul salýdan basqa shara qoldana almaıtyndyqtaryn aıtady. Óıtkeni ol psıhonevrologıalyq dıspanserdiń esebinde turǵan kórinedi. Júıkesi syr bergen ákemen balalardy qaldyrýdan seskengen  mamandar eki jáne bes jastaǵy eki balasyn Gúlsimge alyp berdi. Qazir kelinshekke qaladan ýaqytsha jatyn oryn men jumys taýyp bergen. Al balalary saýyqtyrý ortalyǵynda em  qabyldap jatyr.