QR Bala quqyqtary jónindegi ýákili Zaǵıpa Balıeva zorlyqqa ushyrady delingen 7 jastaǵy ońtústikqazaqstandyq bala otbasynyń áleýmettik mártebesi týraly aıtty, dep habarlaıdy QazAqparat.
«Búginde ákeleri olarmen birge turmaıdy. Qaıda ekendigin de eshkim bilmeıdi. Balanyń týý týraly kýáliginde ákesi jazylǵan, anasy da birge turmaıdy. Senimhat 2017 jyldyń jeltoqsanynan ájesi men tátesinde bar jáne olar balanyń zańdy ókili sanalady. Bala olarmen úsh aılyq kezinen birge turady», - dedi Zaǵıpa Balıeva Ortalyq komýnıkasıalar qyzmetindegi brıfıńte.
Onyń atap ótýinshe, ájesi men tátesinde balanyń quqyǵyn qorǵaýǵa qajetti barlyq quqyq bar.
«2017 jyldyń jeltoqsanynan anasynyń senimhaty boıynsha ájesi men tátesi balanyń zańdy ókili bolyp tabylady. Eger búgin olar ózderine jaýapkershilik alatyn bolsa, onda olardyń tolyq quqyqtary bar. Óıtkeni, atalǵan senimhatta balaǵa qatysty mindetter men quqyqtardyń barlyǵy jazylyp, anasy qol qoıǵan jáne notarıýs kýálandyrǵan. Olar OQO Saryaǵash aýdanyna qarasty Abaı eldi mekeninde jeke páterde turady», - dedi Bala quqyqtary jónindegi ýákil.
